港聞

娛樂

最Hit

即時

中國

國際

星島申訴王

財經

地產

生活

健康

教育

體育

大灣區

專欄

馬經

PLUS

頭條獨家丨馬國明被大媽狂讚靚仔揮晒手數百街坊圍拍外景

即時娛樂

更新時間：14:28 2021-11-18 HKT
發佈時間：22:30 2021-11-17 HKT

馬明當日心情好好，埋位前同工作人員都好好傾。

呢期馬國明曝光率好高，台慶劇《星空下的仁醫》有佢份、拍攝中的《隱形戰隊》亦關佢事，加上又傳佢同湯洛雯就快結婚，今次有啲新意，話佢已訂名牌婚戒，馬明同湯洛雯照舊否認，前者仲話每次有新劇就傳佢結婚：「咁我結得幾多次婚呀？」傳喜事好過傳分手吖，俾人恭喜得多，馬明呢期容光煥發靚仔晒。上周六，馬明及唐詩詠等人為《隱形戰隊》在石門站外拍外景，被數百街坊圍住嘅兩人無詐型，聽到大媽以唔純正廣東話大叫「馬明好高大好靚仔，同電視一樣呀。」馬明仲忍唔住笑笑口揮手添。採訪:譚壹致

真係好好傾。

佢又笑嘞。

當日，劇組朝早7點已喺石門站外開始拍攝，因為周六關係，加上地理位置，一家大細睇拍戲當娛樂，搞到愈拍愈多人圍觀，至中午12時放飯，百幾人睇住馬明、唐詩詠及劉穎鏇食飯盒，都幾好笑。

馬明當日好吸粉
食完飯，馬明等人補完妝就再開工，當日劇情係飾演警察的馬明同唐詩詠等人，要勸個身有炸彈嘅賊(彭懷安飾)冷靜啲，之後爆炸，馬明就扶住唐詩詠走，但都被炸藥嘅威力彈開，兩人繼而仆落地下就完事，話難唔難，但因為要多角度拍攝，都Take咗好多次，但馬明都無變樣，仲Keep住好笑容，聽到大媽叫佢個名，讚佢「好高大好靚仔，同電視一樣呀」仲係咁笑同揮手。

好多大媽讚馬明，馬明又揮手嘞。

一收工，馬明即被街坊極速圍住。

大媽小妹妹都冧
拍到下晝5點收工，馬明等演員好興奮，圍觀嘅街坊更加興奮，因為終於可以走近馬明求合照，唔係講笑，以「天然呆」馳名將軍澳嘅馬明原來深受大媽歡迎，一見佢換好衫就拎住電話湧住埋身影相，個個用個頭挨住馬明膊頭合照，馬明來者不拒，連細路女都「唔該馬明影張相吖。」咦，咁搞法，馬明今年有望冧莊視帝喎。