【頭條獨家】拆夥Show唔再忍隨時爆粗天堂鳥超討厭《登陸太陽》MV

即時娛樂

更新時間：21:02 2021-07-23 HKT
發佈時間：23:59 2021-07-22 HKT

天堂鳥成員各有發展。

成軍7年嘅男子組合天堂鳥（BOP）宣佈拆夥，下月14日喺九展舉行《The Last Dance！》，最後一次演唱會將重溫7年嚟點滴，仲會剖白內心感受，Lincoln預言：「都最後一次啦！有乜唔鍾意，唔鍾意邊個咪直接講！隨時會爆粗添呀！」講到入行最介意，三人表示出道作《登陸太陽》MV變笑柄最唔開心。採訪：方騫平攝影：梁志明埸地：Hangout Studio

天堂鳥出道作《登陸太陽》MV成為MK-Pop代表作，化晒濃妝兼搽埋黑色指甲油造型被取笑好「騎呢」。

兩年前3人加盟天盟娛樂，重新出發。

天堂鳥兩年前加盟天盟娛樂重新出發，最終由轉做園藝生意，打算成家立室嘅「細佬」歐喬鋒（Tyrese）提出唔再玩落去。不過他強調並非傳聞中鬧不和：「其實一定會好唔捨得會掛住嘅，但都發展咗咁耐，要為自己打算吓，解散對我哋嚟講唔係負面，反而係新嘗試，唔再依賴。」

開心MIRROR被追捧
葉泓聲（Gordon）都認同係好事：「佢畀機會我哋獨立，我哋好似老夫老妻要離婚，但都仲係屋企人，他朝可能重婚再聚！不過坦白講，合作咁耐點會冇拗撬？大家只係為件事好。而且分開咗唔再三為一體，觀眾先留意到我哋特質。」許俊豪（Lincoln）話如果當日冇咗兩個拍檔分擔，被取笑MK-Pop一定撐唔住：「尤其初出道《登陸太陽》MV，無論喺服裝造型都出晒事，我哋拍完粗口都出埋，呢7年嚟未見過咁差嘅MV，而且對我哋有好負面嘅影響，多年嚟都洗唔到底。」對於人氣男團MIRROR紅到癲，他們開心見到有本土男團被追捧，不過Gordon笑說：「如果MIRROR係拍《登陸太陽》MV，可能唔係𠵱家嘅MIRROR！」