【头条独家】拆伙Show唔再忍随时爆粗天堂鸟超讨厌《登陆太阳》MV

即时娱乐

更新时间：21:02 2021-07-23 HKT
发布时间：23:59 2021-07-22 HKT

天堂鸟成员各有发展。

成军7年嘅男子组合天堂鸟（BOP）宣布拆伙，下月14日喺九展举行《The Last Dance！》，最后一次演唱会将重温7年嚟点滴，仲会剖白内心感受，Lincoln预言：「都最后一次啦！有乜唔钟意，唔钟意边个咪直接讲！随时会爆粗添呀！」讲到入行最介意，三人表示出道作《登陆太阳》MV变笑柄最唔开心。采访：方骞平摄影：梁志明埸地：Hangout Studio

天堂鸟出道作《登陆太阳》MV成为MK-Pop代表作，化晒浓妆兼搽埋黑色指甲油造型被取笑好「骑呢」。

两年前3人加盟天盟娱乐，重新出发。

天堂鸟两年前加盟天盟娱乐重新出发，最终由转做园艺生意，打算成家立室嘅「细佬」欧乔锋（Tyrese）提出唔再玩落去。不过他强调并非传闻中闹不和：「其实一定会好唔舍得会挂住嘅，但都发展咗咁耐，要为自己打算吓，解散对我哋嚟讲唔系负面，反而系新尝试，唔再依赖。」

开心MIRROR被追捧
叶泓声（Gordon）都认同系好事：「佢畀机会我哋独立，我哋好似老夫老妻要离婚，但都仲系屋企人，他朝可能重婚再聚！不过坦白讲，合作咁耐点会冇拗撬？大家只系为件事好。而且分开咗唔再三为一体，观众先留意到我哋特质。」许俊豪（Lincoln）话如果当日冇咗两个拍档分担，被取笑MK-Pop一定撑唔住：「尤其初出道《登陆太阳》MV，无论喺服装造型都出晒事，我哋拍完粗口都出埋，呢7年嚟未见过咁差嘅MV，而且对我哋有好负面嘅影响，多年嚟都洗唔到底。」对于人气男团MIRROR红到癫，他们开心见到有本土男团被追捧，不过Gordon笑说：「如果MIRROR系拍《登陆太阳》MV，可能唔系𠵱家嘅MIRROR！」