港聞

娛樂

最Hit

即時

中國

國際

星島申訴王

財經

地產

生活

健康

教育

體育

大灣區

專欄

馬經

PLUS

【頭條獨家】相隔年半再上台同黎明鬥Fit　鄭伊健做步兵買啡慰妻當運動

即時娛樂

更新時間：11:12 2021-07-23 HKT
發佈時間：21:15 2021-07-22 HKT

繼上次以「全黑浩南Look」食茶記後，伊健再以一身全黑短Tee短褲街坊Look落街。

有「隱世樓王」之稱的鄭伊健踏入收成期，在疫情下同太太蒙嘉慧（Yoyo）都深居簡出，就算出街也離不開淺水灣寓所一帶。靜極思動的伊健近日又再活躍幕前，繼早前拍攝育髮品牌廣告後，上周四（15日），1年半未踏舞台的伊健為黎明紅館騷擔任嘉賓，兩位Fit爆「五字頭」男神合唱一曲《友情歲月》，High爆全場！盛傳「古惑佬」伊健、小春與天華等將參與內地綜藝節目《哥哥的滾燙人生》，日前趁未出埠，伊健就盡「廿四孝老公」責任，大熱天時撲出街買熱咖啡畀老婆飲，見佢急步行，有電梯唔搭，唔會浪費每一個Keep Fit機會。採訪：張詠森

YoYo透過手機人肉聲控伊健落Order，最終喺30幾度高溫下叫咗熱咖啡。

等攞咖啡期間，企埋喺角落的伊健不停眨眼，狀甚眼瞓。

53歲的鄭伊健身材Fit爆，全靠平日勤做運動，好似早排幸福肥的蒙嘉慧跟友人去淺水灣公園開Live教拉筋，路過的伊健以一身運動Look驚喜現身，為老婆打氣。而平日，伊健都鍾意行路當運動，日前下午3時許，《頭條日報》記者就撞到佢從屋企步行到The Pulse商場，繼上次被本報拍得以「全黑浩南Look」落街食茶記後，當日他再以黑口罩、黑Tee襯黑短褲加黑鞋，急急腳殺上2樓文青咖啡店%Arabica買嘢飲。甫走到櫃枱，伊健即拎出手機撥個輪問問「家庭觀眾」，估計是詢問老婆大人有咩Order。

伊健由寓所行去商場5分鐘，再喺Coffee shop用5分鐘買咗兩杯咖啡，然後極速行返屋企。

拎住兩杯熱咖啡的伊健，有電梯唔搭選擇行後樓梯離開，真係好健康。

眼眨眨現攰樣
其間，未知伊健把聲是否太好認，即使他全程戴住口罩，但仍有顧客察覺到「浩南哥」的存在，一路回頭偷望伊健。跟電話中人講咗兩句，再同職員落埋Order，伊健便企喺角落頭一邊等一邊撳手機；未幾，他又抬頭睇吓啲嘢飲Ready未，見伊健不停眼眨眨周圍望，睇嚟好攰吓喎，難怪要買咖啡提提神。最後喺高溫30幾度下，他一來一回行咗十分鐘，原來只為買兩杯熱咖啡返屋企同Yoyo一齊歎；回程時有電梯唔坐，伊健偏偏揀行後樓梯離開，所以話「沒有肥中佬，只有懶中佬」，難怪咁Fit。