港聞

娛樂

最Hit

即時

中國

國際

星島申訴王

財經

地產

生活

健康

教育

體育

大灣區

專欄

馬經

PLUS

【頭條獨家】「AO黎明」60歲繼續追夢楊立門做全職歌手欣賞MIRROR

即時娛樂

更新時間：14:25 2021-06-11 HKT
發佈時間：22:56 2021-06-10 HKT

冇官職一身輕，楊立門笑得好開懷，仲話𠵱家可以自由自在做全職歌手。

「AO黎明」楊立門(前任發展局常任秘書長)（Raymond）於6年前提前退休，之後做咗幾年香港中華廠商聯合會行政總裁，月多前請辭，冇官一身輕的他，60歲繼續追夢！目前正趕緊為6月15日喺文化中心舉行嘅《楊立門的音樂回憶音樂會》綵排，雖然人到中年但仍緊貼香港樂壇，一啲都唔Out：「我最鍾意欣宜、林家謙，MIRROR都好正呀！」採訪：方騫平攝影：譚壹致

楊立門於本月15日在文化中心舉行《楊立門的音樂回憶音樂會》，反應比預期熱烈得多。

同Raymond好合拍嘅何婉盈及小龍女任表演嘉賓。

因為疫情關係，楊立門演唱會由去年押後到至今：「原先以為搞唔掂，因為限聚令只容許一半入座率，條數計落唔化算，好彩疫情緩和放寬到七成半觀眾，咁啱6月份文化中心有個期就嗱嗱聲擸住。」

楊立門唔擔心疫情：「因為台前幕後會做晒核酸檢測，除咗我之外，幕後團隊同埋觀眾全部會戴住口罩，正如戲院開返，都冇出現過戲院群組啦！」最令他驚喜最貴嘅飛一早賣晒，可能觀眾餓咗演唱會好耐。他透露個唱邀得趙增熹客串伴奏幾首歌，仲有何婉盈及小龍女（龍婷）出任嘉賓，另外他創作嘅兩首新歌《哀樂之年》及《she is my lady》會喺演唱會中首唱：「《哀樂之年》係帶點感慨，諗返以前我搏生搏死到底為乜？下半生我要同最愛安安靜靜咁渡過，𠵱家算係最舒服狀態。我喺官場都效力咗幾十年，老人牌都拎埋，乜都夠啦，人係要有理想嘅，𠵱家可以全職做歌手去追夢，好好享受人生。」

楊立門對上一次開Show是2019年初，所以本月文化中心場館有期即搶咗先。

楊立門曾參加1982年舉行的第一屆新秀歌唱大賽，但參賽期間獲政府取錄，只好退出比賽。

對於演唱會Rundown，Raymond說：「我會唱林子祥嘅《最愛是誰》、經典老歌《Longer》等。」問到好留意香港樂壇的他會否唱姜濤的《蒙著嘴說愛你》？Raymond笑說：「唔識唱佢嘅歌，因為未必啱我唱，我當然識佢，仲好欣賞MIRROR，因為Boy band邊唱邊跳好養眼。」另外，他也喜歡創作歌手林家謙及好唱得嘅鄭欣宜。