港闻

娱乐

最Hit

即时

中国

国际

星岛申诉王

财经

地产

生活

健康

教育

体育

大湾区

专栏

马经

PLUS

【头条独家】「AO黎明」60岁继续追梦杨立门做全职歌手欣赏MIRROR

即时娱乐

更新时间：14:25 2021-06-11 HKT
发布时间：22:56 2021-06-10 HKT

冇官职一身轻，杨立门笑得好开怀，仲话𠵱家可以自由自在做全职歌手。

「AO黎明」杨立门(前任发展局常任秘书长)（Raymond）于6年前提前退休，之后做咗几年香港中华厂商联合会行政总裁，月多前请辞，冇官一身轻的他，60岁继续追梦！目前正赶紧为6月15日喺文化中心举行嘅《杨立门的音乐回忆音乐会》彩排，虽然人到中年但仍紧贴香港乐坛，一啲都唔Out：「我最钟意欣宜、林家谦，MIRROR都好正呀！」采访：方骞平摄影：谭壹致

杨立门于本月15日在文化中心举行《杨立门的音乐回忆音乐会》，反应比预期热烈得多。

同Raymond好合拍嘅何婉盈及小龙女任表演嘉宾。

因为疫情关系，杨立门演唱会由去年押后到至今：「原先以为搞唔掂，因为限聚令只容许一半入座率，条数计落唔化算，好彩疫情缓和放宽到七成半观众，咁啱6月份文化中心有个期就嗱嗱声擸住。」

杨立门唔担心疫情：「因为台前幕后会做晒核酸检测，除咗我之外，幕后团队同埋观众全部会戴住口罩，正如戏院开返，都冇出现过戏院群组啦！」最令他惊喜最贵嘅飞一早卖晒，可能观众饿咗演唱会好耐。他透露个唱邀得赵增熹客串伴奏几首歌，仲有何婉盈及小龙女（龙婷）出任嘉宾，另外他创作嘅两首新歌《哀乐之年》及《she is my lady》会喺演唱会中首唱：「《哀乐之年》系带点感慨，谂返以前我搏生搏死到底为乜？下半生我要同最爱安安静静咁渡过，𠵱家算系最舒服状态。我喺官场都效力咗几十年，老人牌都拎埋，乜都够啦，人系要有理想嘅，𠵱家可以全职做歌手去追梦，好好享受人生。」

杨立门对上一次开Show是2019年初，所以本月文化中心场馆有期即抢咗先。

杨立门曾参加1982年举行的第一届新秀歌唱大赛，但参赛期间获政府取录，只好退出比赛。

对于演唱会Rundown，Raymond说：「我会唱林子祥嘅《最爱是谁》、经典老歌《Longer》等。」问到好留意香港乐坛的他会否唱姜涛的《蒙著嘴说爱你》？Raymond笑说：「唔识唱佢嘅歌，因为未必啱我唱，我当然识佢，仲好欣赏MIRROR，因为Boy band边唱边跳好养眼。」另外，他也喜欢创作歌手林家谦及好唱得嘅郑欣宜。