Jer唔敢送戒指畀女友姜濤自言唔係好男朋友

即時娛樂

更新時間：13:46 2021-02-16 HKT
發佈時間：14:30 2021-02-15 HKT

姜濤自言為人好悶，更搞笑勸大家不要找他這類男生拍拖。

MIRROR成員姜濤、柳應廷（Jer）及江𤒹生（Anson Kong）昨晚舉行線上音樂會，情人節正日要開工，Jer透露今日會和女友補祝：「活動前買咗同時裝潮流有關的禮物畀女友，相信佢會滿意！（會否送戒指？）唔敢送呀！戒指意義咁重大，唔可以亂送。」單身的AK表示情人節冇女約，亦未有心儀對象；擇偶條件只要能接受他做藝人便可以。咁經理人花姐係咪最適合？他笑說：「花姐內在OK㗎！（外在不OK？）外表都得，只是她不OK我的樣子，哈哈！（找圈中人？）圈外人較好，如果唔係，我驚自己會因為對方要拍親熱戲而呷醋。」

現時單身的Anson Kong表示情人節未有異性相約，亦暫時冇心儀對象。

情人節正日要開工的Jer，今日會和女友補祝。

至於A0的姜濤則對拍拖順其自然，未遇到心儀女仔的他仲即席示範「趕客」：「大家不要找我這種人做男朋友喇！（花姐都話你悶。）認同呀！平時不算，但可能對住花姐時更加悶呢！（有冇人向你示愛？）冇喎，身邊少異性朋友。」問到Jer會否介紹異性給單身的隊友認識，他坦言不敢做媒人，以免第時有手尾跟；AK就試過與朋友介紹的女生拍拖，最後分手影響到兄弟友誼。開工利是方面，AK透露準備了4位數字利是；Jer大呻隊友沒提醒，兩手空空開工的他只好之後補發。姜濤則最鬼馬，準備了不同面額的利是讓工作人員抽，金額由雙位數至3位數字不等。