港聞

娛樂

最Hit

即時

中國

國際

星島申訴王

財經

地產

生活

健康

教育

體育

大灣區

專欄

馬經

PLUS

【頭條獨家】每周享受幾粒鐘男人的浪漫森美張繼聰對老婆一條心

即時娛樂

更新時間：23:10 2020-09-10 HKT
發佈時間：22:54 2020-09-10 HKT

張太謝安琪好鍾意坐電單車尾。

啱啱簽咗古天樂公司嘅張繼聰，事隔多年再出新歌《David Harleyson》，仲搵埋一班古董電單車迷如森美等人友情客串，一齊幫手拍MV，寓工作於娛樂。森美同張繼聰志趣相投，亦係顧家好男人，森美笑言：「駕駛電單車要更加集中精神，訓練到個人有少少冥想狀態，咁就唔會亂咁諗埋啲冇謂嘢！」睇嚟森美舊拍檔細So要學吓揸電單車喇！採訪：方騫平攝影：張詠森

結婚20年，森美對老婆一條心，駕駛電單車可集中精力，唔使諗埋啲冇謂嘢。

平日張繼聰為家庭而忙碌，所以要搵方法平衡生活及工作。

日前森美及張繼聰，駕駛深愛嘅Harley Davidson古董電單車享受男人的浪漫，一班車友幾乎每個周日早上都有聚會，飲完茶兜完風，中午12點前就要趕返屋企交人。張繼聰好Enjoy呢幾個鐘頭，因為係屬於中佬嘅自由時間：「一班人聚埋遊車河係一種減壓方式，而且男人去到某個階段要有個嗜好，唔係食就瞓，個人好易走樣。」森美點頭同意，他們更影響到一班車迷變得愈嚟愈健康，大家都想有fit爆身形，可以着住靚衫揸住部車影靚相。

一對子女被阿聰感染都鍾意玩小型電單車。

呢部絕版電單車係謝安琪送畀張繼聰嘅生日禮物，特別珍貴。

電單車「毒」性好強
張繼聰爆森美有4部電單車，其中一部係用嚟買餸嘅「綿羊仔」，最離譜仲有部「駁腳車」，開去揸其他車，阿聰笑說：「嗱！4部就太離譜喇，我只得3架，而其中一架絕版PS-520係老婆謝安琪送我嘅生日禮物。因為電單車唔貴又慳地方，毒性真係好大。」除咗愛電單車，兩人坦言對老婆一條心，阿聰說：「我老婆咁索，唔使諗出軌，我追我老婆都未追得掂呀！」森美笑說：「唔係個個人都好似我哋咁好運，不過，揸電單車都訓練到集中精神，唔會亂咁諗埋啲冇謂嘢！其實寫一部以電單車為題材嘅劇集都唔錯，由開車講人生，疫情下更貼切，唔少人駕車做送外賣。」