【頭條獨家】晚飯時間幫襯便利店陳家樂買蕉醫肚

即時娛樂

更新時間：19:42 2020-01-20 HKT
發佈時間：19:35 2020-01-20 HKT

33歲嘅陳家樂呢排好多戲上，賀歲檔已經有兩套，分別係《緊急救援》同《我的筍盤男友》，所以呢期佢好忙，忙做訪問宣傳，所以娛樂版成日都見到佢。日前晚上六點，全身黑包到實嘅陳家樂揸車去咗銅鑼灣一間便利店買嘢食，晚飯時間唔坐定定食，佢選擇買三文治加寶礦力加兩條蕉做晚餐，真係忙到咁咩?採訪:梁志明

陳家樂03年參加新秀，入過十六強，直至06年簽約英皇先正式入行。自18年同余香凝分手後，男方以事業為先，戲接戲相當忙，更憑TVB劇《逆緣》中的「冷凍爺爺」入晒屋，極速吸入大量粉絲，當事人表示相當驚訝。

五分鐘無咗320蚊
上新聞搜尋網Wise Search打陳家樂三個字有好多資料，除當事人有兩部戲上外，佢同關智斌及楊天宇主持嘅網上節目《三夫當關》又有新聞稿，連陳瀅嘅訪問都會提到佢個名。日前晚上六點，由帽到衫到褲到背囊都黑色嘅陳家樂揸車去到銅鑼灣時代廣場附近，戴住口罩嘅佢落車後就急急行去便利店，見佢望咗一陣，揀咗一件三文治同一支寶礦力，臨去埋單再買多兩條蕉，然後快步行返上車，由買到行上車都唔使五分鐘，但佢臨上車前好似拎住張紙，疑似違例泊車罰款單，如果為咗買三文治而無咗320蚊，咁就真係好唔抵嘞。