港聞

娛樂

最Hit

即時

中國

國際

星島申訴王

財經

地產

生活

健康

教育

體育

大灣區

專欄

馬經

PLUS

【頭條獨家】Dry足3年大解放楊柳青街頭連環啜老外Hot爆

即時娛樂

更新時間：23:53 2019-12-04 HKT
發佈時間：21:30 2019-12-03 HKT

咀完又咀咀咗一次唔夠喉，老外攬實楊柳青咀多次。

「新一代打女」楊柳青（Wiyona）早前在TVB劇集《解決師》飾演性感女秘書Tracy，一場大露背出浴戲加三點式色誘戲，32BFit爆身材勁吸睛。自稱單身的她，曾自嘲好打得冇仔敢埋身，去年與唐文龍傳完緋聞又不了了之。早前三度現身銅鑼灣的她，頭兩次自己買外賣、陪朋友行街，素顏街坊look一啲都唔養眼，到最後一次會猛男老外，她Set晒頭、化行妝兼着白色貼身Top，男人見到都嗒糖。最初兩人行街談情，到買外賣嘢飲時愈企愈埋，終忍唔住喺街頭激咀兩次，之後男方再肉緊啜楊柳青塊面，只見女方好冧好受落，然後兩人再深情擁抱。激情完，他們攞埋外賣嘢飲攬住腰黐實離開，好Hot呀！採訪：梁志明

甜蜜錫面咀咗兩次，老外再啜楊柳青塊面好Sweet。

甜遊銅灣兩人攞完外賣嘢飲，攬到實再去遊銅鑼灣。

拍開打戲嘅楊柳青，今年拍TVB劇集《解決師》時，一反常態飾演斯文性感女秘書Tracy，先偕李天翔拍場出浴戲，大露背超Sexy，之後着三點式泳衣色誘大隻仔溫家偉，再騷32BFit爆身材，睇到觀眾嘩嘩聲！一直自稱單身的她，曾透露拍拖經驗超過10次，對上一次已是3年前，因被當時男友摑了一巴而決心分手。到失戀後唔想浪費時間，便決定學功夫增值自己，除咗詠春和泰拳，仲有刀、槍、棍、劍乜都學，務求成為全能的動作演員。這幾年雖然成功建立打女形象，但感情卻Dry到爆，她曾笑言：「女仔咁打得，啲男仔都畀我嚇走晒，但幾Tough嘅女仔都想有人錫到自己燶，可以寵壞我，令我變成小女人。」

街坊look唔起眼
事有湊巧，早前見楊柳青三度現身銅鑼灣，頭兩次她都是素顏街坊look唔多起眼。第一次是獨自去時代廣場City Super買外賣飯盒，見她鍾情西式走地雞和豬仔骨，買完後就急急腳離開。第二次係約咗一男一女友人行街，他們先去連卡佛睇鞋，只見楊柳青係咁睇Boots，之後試咗對長到大髀嘅黑色Boots，但最後都係冇買。跟住佢再陪女友人去BV睇袋，只見楊柳青意見多多，一時拎起個Tote Bag畀女友人睇，一時又一齊去睇銀包，但三個吹水多過想買嘢，在店內搞咗大半個鐘都係空手而回。

拍劇晒咪早前楊柳青在劇集《解決師》的色誘戲，大晒32B身材。

露背Sexy《解決師》中楊柳青最爆肯定係這場大露背超Sexy出浴戲。

被狂咀好受落
最後一次，楊柳青個look明顯好唔同，除咗Set晒頭、化行妝，仲着白色貼身Top襯黑褸黑褲，一副戰鬥格咁，原來係約咗老外去行街。楊柳青先陪對方去渣甸坊的便利店買嘢，跟住二人再行過隔離買外賣台灣飲品。其間二人邊等邊傾、東指西指笑得好開心，傾得興奮時，楊柳青仲挨住男方好溫馨。全晚高潮係老外突然攬住楊柳青咀嘴，咀完30秒都未夠喉再咀多次，跟住老外又好肉緊咁啜楊柳青塊面，只見楊柳青好冧好受落，並露出一絲絲嘅甜笑，然後兩人再深情擁抱。其實當時是傍晚約6點半，條街都人來人往，但佢哋當啲途人冇到，攞完嘢飲仲攬住對方條腰繼續Sweet Sweet遊銅鑼灣，好Hot呀！楊柳青曾表示現在有追求者，只是工作太忙冇時間發展。隨着年紀愈大，愈發覺一見鍾情不可信，搵另一半應該先了解，覺得適合自己才去拍拖。看她對老外嘅熱情咁受落，好大機會係Mr.Right啦！