泳兒拍MV沉落水底遇小意外以為自己會死

更新時間：15:27 2021-11-01 HKT
發佈時間：16:30 2021-11-01 HKT

故仔係講兩個女仔超越咗友誼嘅關係。

泳兒（Vincy）今日推出新歌《沉溺》，歌詞源自她跟填詞人周耀輝分享首次考潛水牌及潛水經歷，「遇到一個小小嘅意外，當我想浮上水面嘅時候，我撳極救生衣個浮水掣都撳唔到，嗰刻我覺得會死喺水底。輝哥聽完故仔後，就將我呢次經歷寫咗喺《沉溺》入面。」歌曲以愛情角度出發，愛到可以放棄呼吸、愛到窒息嘅感覺，Vincy更透露周耀輝填這首歌時，差點填到窒息，「佢係辛苦到填到就嚟想死咁，我第一次聽嘅時候，好似有一種瀕死嘅感覺，唱到要死。」

泳兒拍攝時撳極救生衣個浮水掣都撳唔到，嗰刻以為自己會死喺水底。

MV繼續找來合作無間的Sheng拍攝，不過今次Vincy的參與度有別以往，「之前嘅MV我嘅參與度係好多，由頭帶到落尾。今次有一大部份係有好好嘅演員幫我去演繹個故仔。故仔係關於兩個女仔嘅關係，係超越咗友誼、超越咗性別嗰種愛、嗰種沉溺。MV中亦都有一啲穿越嘅元素。當我沉落去泳池底再浮上水嗰一刻，其實我係穿越咗去另外一個世界。」至於整個拍攝都要浸水，Vincy就話一點也不辛苦，原來她十分喜歡游水，「我其實係幾鍾意游水，咁我都好耐冇游水啦，哈哈，所以頭先break嘅時候都乘機游咗兩吓，但發現：『咦！好似有啲生疏喎，又有啲唔夠氣喎……』」她更說自己跟「水」有緣，「以往很多MV都同水有關，自己個名又有水啦。拍MV水同典地都試過，未試過喺空中，唔知下個mv會唔會飄浮喺空中？我自己都好期待。」