我要做業主2丨黃庭鋒用台慶巨額獎金上車：講到尾都要多謝公司

更新時間：22:34 2021-09-27 HKT
發佈時間：11:00 2021-09-28 HKT

黃庭鋒的媽媽支持兒子買樓！

TVB上位小生黃庭鋒在2018年台慶當晚贏得100萬元巨獎，想不到這筆錢竟然令他成功上車。日前黃庭鋒為《我要做業主2》擔任嘉賓，提到在去年購入天水圍一個新樓盤，而新屋的首期，正正是當日台慶贏得的獎金，他說：「講到尾都要多謝公司，喺2018年台慶贏咗個大獎，現金有51萬，同埋有49萬嘅禮品，夾埋就100萬，嗰筆錢一路諗住畀爸爸媽媽任用，阿媽話好似想話去澳洲，我就話攞去啦，跟住佢一啲都冇用過，咁啱有次我哋行過去睇樓，媽媽叫去望一望，嗰陣我又冇話好大慾望。」

他表示當時家人見到附近的環境不俗，又保育，又濕地公園：「嗰次之後，佢隔兩日就同我講一次，話筆錢不如唔好嘥咗擺喺度，不如用嚟畀首期上車。」結果大約2、3個星期後，他們決定將想法付諸實行。黃庭鋒又表示一直都有儲蓄習慣：「我屋企好得意，媽媽好細個就同我講要儲錢，佢已經畀咗呢個概念我，同埋我唔係好大使，我會將收入嘅一半儲起，一直覺得擺喺銀行好穩陣，所以冇好急切去做呢樣嘢，直到後尾發覺一味去拖就上唔到車，一諗又會拖多1、2年，總會有啲諗法令整件事慢咗落嚟，所以有咗部署之後就要決定果斷，當你覺得呢個係正確選擇時，就應該去做。」

榮升業主後，黃庭鋒坦言顛覆自己的理財概念：「每個月差唔多有一半嘅錢都供喺度，一開始有少少唔慣，我平時唔使錢㗎，點解冇咗咁多？其實係擺咗去供樓，所以又覺得係值得。當我上咗車後，發覺升緊，所以某程度上係改變咗我諗法，不過又未去到好極端，但係有啲位係可以去搏吓！」