靠龍婆一角深入民心羅蘭姐：初初以為係做「聾婆」

更新時間：21:27 2021-08-23 HKT
發佈時間：11:00 2021-08-24 HKT

羅蘭姐早前接受家燕姐的訪問。

羅蘭日前獲薛家燕的邀請，與鬼王潘紹聰接受新城節目《光影夢工場》訪問，入行超過60年的羅蘭姐，曾參演超過三百多套電影，但最初入行原來是「睇人拍戲」，她笑說：「嗰陣我18歲，陪同學睇人拍戲。導演想搵人演工人，同學唔肯拍，我紮住孖辮，所以搵我去拍。嗰時係李鵬飛（鵬飛叔）做老爺，老爺講完對白，我應一聲『哦』」就可以。」機緣巧合之下，羅蘭姐就獻出了「第一次」：「當時我屋企環境好差，冇錢交學費。冇學返，就跟同學去睇拍戲，做完嗰一場臨記有10蚊，但我唔敢同屋企人講，因為屋企人覺得『成人不成戲，成戲不成人，貪威識食練精學懶，你就去做戲』！」

羅蘭飾演龍婆深入民心。

當以為『明星夢』已完，但其實才是羅蘭姐真正的開始：「三日後，劇務去我屋企搵我再拍另一場，媽媽好驚訝，唔准我出門口。劇務求媽媽，話如果連唔到戲佢就會失業，所以媽媽心軟俾我去拍，最後媽媽跟去片場，拍完戲後媽媽想我繼續搵工，但我當時未有身份證，好多工都唔請，所以我求媽媽俾我再去拍戲，點知從此就拍咗好多套。」

講到恐怖片，羅蘭姐在電影《七月十四》中飾演龍婆，一定最深入民心，但原來羅蘭姐最初以為是演「聾」婆：「當時導演嚟搵我，我仲以為係做『聾」婆，其中有一幕要敲經念佛，但導演又冇話係咪『聾』，我當時冇再追問就照做。記得有一幕係劉青雲同陳明真去完舊屋坐車走，龍婆喺車頂大力拍落去，呢一幕嚇親好多觀眾。」其後龍婆角色變成又識問米，同鬼神掛勾，羅蘭姐作為天主教徒，亦曾經因此而問過神父：「有日安德尊喺化妝間問我，作為天主教徒但做問米婆有冇抵觸？我本身都冇諗過呢個問題，於是我見到神父就請教佢，神父話我係演員，我知道而家只係做戲，咁就冇問題喇。」