年底喜迎第二胎黎諾懿賣關子唔講仔定女

更新時間：19:35 2021-07-24 HKT
發佈時間：18:35 2021-07-24 HKT

黎諾懿自言緊張大師，對囝囝面留印仔感內疚。

黎諾懿暖爸形象深入民心，太太更曾稱讚他為神隊友。諾懿在電台節目內剖白，提起五億駙馬的稱號，他繼續一笑置之：「係，佢（太太）家底好，拍拖嗰時去茶餐廳食飯，又話佢紆尊降貴，又話要佢坐我架爛車，其實我架車係唔貴，不過唔喺爛，我哋住嗰間村屋都唔係破屋。大家睇啦話我食軟飯，唔緊要都係我食，你哋唔需要咁勞氣。我冇壓力，太太係覺得我可以付託終身先揀我嫁我。」他承認身家短期內沒可能追及女家，「其實時間可以證實一切，我哋結婚快7年，如果真係唔使做，好舒服，我上咗岸啦！你見到我由早做到夜，連飯都煮埋，其實我希望用自己嘅努力養活自己屋企人，事業上繼續創出一片天！」
年底將喜迎第二胎，諾懿卻自認是緊張大師：「其實我對個仔有啲內疚，佢玩波波池惹到珍珠疣，手仔傳染到面仔，依家面上有一粒印仔，我每次見到佢嗰粒印仔，心裏面好唔舒服，如果可以早啲處理應該冇事，太太勸我個仔大個咗可以去做激光，我就係一個緊張大師爸爸。12月再做爸爸，究竟BB係男係女？畀我賣個關子，不過我諗都同上次一樣，我唔敢剪臍帶……」。