Anson Lo千字文吐心聲承諾下一次再畀大家睇到不同的一面

更新時間：13:37 2021-07-18 HKT
發佈時間：10:00 2021-07-18 HKT

Anson Lo撰千字文分享感受！

ViuTV劇集《大叔的愛》前晚大結局，除了觀眾留言表示不捨得外，飾演阿牧的Anson Lo當然百感交集，昨晚在IG撰寫千字文，一方面分享拍此劇的感受，另一方面亦感謝劇組的信任，他說：「記得初初公司考慮緊我接唔接拍呢部劇嘅時候，我剩係想像都覺得係會有一定嘅壓力，因為睇過原劇日版實在有太深刻嘅感受，每一個角色都好獨特又岀色，每一個場口都好自然但有趣，每一段關係都好虐心但溫暖。自己一開始係好擔心演繹唔到日版嘅精神，甚至會糟蹋咗日版，令大家失望。但心裏知道呢個係一個好好嘅機會去試煉，去測試一下自己繼《男排女將》Bobby一角之後可以做到幾多，所以最後同花姐講『我想拍』。」

Anson Lo一度忘記了自己原來的身份。

台前幕後相處愉快。

在拍攝的日子，Anson Lo不時有一種感覺覺得「Anson Lo」在這個世界彷彿消失了，被好多重寂寞的氣圍包圍住：「好感謝每一位觀眾支持大叔的愛，支持阿牧[ 哩一個角色。呢三個星期收到好多大家嘅留言，見到大家都好代入每一位角色去分析劇情，你哋會跟住我哋笑、跟住我哋喊。呢三個星期就好似每晚都同大家一齊睇電視咁，大家唔單止會聽主題曲同片尾曲，仲會同阿牧一齊聽阿牧嘅歌單，一齊去感受阿牧嘅內心世界，好感恩可以同你地每一位有一個咁大嘅bonding。」

Anson Lo多謝監製的信任。

Anson Lo亦感謝劇組的信任：「感謝ViuTV令到港版嘅大叔的愛誕生。多謝監製Tommy同導演CK對我嘅信任，兩位由頭到尾都好相信好鼓勵我。好記得拍攝中段我成日問兩位我有啲咩要調整，佢哋異口同聲答我：『如果你做得唔好我哋一定會同你講，但首先你要俾多啲信心自己，唔好下下覺得自己一定會做得唔好。』你哋嘅鼓勵係俾咗好大嘅勇氣我。感激製作組、拍攝組同埋台前幕後所有工作人員成就哩一套劇，冇你地每一位嘅汗水都唔會有依家大家睇到嘅每一個場景、畫面。辛苦晒大家」

最後他說：「多謝「阿牧」教咗我好多嘢。好早前我講過『每個人都需要一個阿牧』，因為佢令我明白日常生活上待人處事可以再多啲企喺人哋角度諗、多啲照顧身邊嘅人、佢對愛情嘅執著，同埋提醒我係時候要認真學下煮嘢食，感激大家對我嘅包容，演戲上有太多地方要學習同努力。希望大家感受到港版大叔的愛嘅認真同埋背後意義，感受到每一個角色嘅投入。Anson Lo會繼續努力，因為我知道我真係好享受演戲！希望下一次再畀大家睇到Anson Lo唔同嘅一面！」