灑淚否認係難頂僱主蔡一鳳展示七千呎豪宅力證有善待家傭

更新時間：11:53 2021-06-24 HKT
發佈時間：11:00 2021-06-24 HKT

蔡一鳳否認係無良傭主。

前亞視高層盛品儒太太蔡一鳳（Michelle）月初在社交網站發千文不滿被玩，控訴6名外傭及1名司機竟然喺短短一個月內先後離職，由於工人咁齊心，因而被網民質疑她係「最難頂僱主」。Michelle為此接受TVB《東張西望》訪問，並提供有關家傭疑似偷5卡鑽戒嘅片段，及未經剪得太碎餵BB嘅食物相作出反擊。

巨型廚房有大型雲石枱，由家傭分成兩批，每批3個人喺度食飯。

廚房內有兩間冷凍房，存放生果蔬菜和凍肉，就算兩公婆外出應酬，可隨家傭喜歡煮飯食。

主持人利穎怡（Joan）在赤柱7000呎獨立屋豪宅內訪問Michelle，她表示連埋一對龍鳳B，一家4口由6位家傭，兩位司機照顧。3個家傭負責料理小朋友；1位清潔1人洗燙衣服及1人煮飯；另有兩名司機。節目中Michelle展示家傭的生活環境，包括傭人用餐區，廚房內有兩間冷凍房，存放生果蔬菜和凍肉，就算兩公婆外出應酬，可隨家傭喜歡煮飯食。而睡房設有6張單人碌架牀及提供空調，每張碌架牀都有布簾，增加私隱度。向海嘅嬰兒房和兒童遊樂室內仲有3個碌架牀，提供畀家傭陪BB瞓覺。她自辯道：「如果我係咁苛刻，就唔會請6個工人啦！請兩個咪夠囉，我只係想佢哋舒服啲！」

哭訴家傭絕情
她指控當中有位傭人犯大錯在先仍然黑面駁嘴才被解僱，事件發生喺4月21日，其中一人曾將多塊未切細嘅肉餵幼子，搞到BB嘔到出黃膽水。另一名工人則搏炒，用西瓜刨刮花屋內價值幾十萬嘅銀器。Michelle更提供片段，指出一名家傭疑似喺離職時，涉偷取她一夥自家公司出品5卡嘅戒指，但基於冇證據係由工人放入行李內，故無法提出控告，而該家傭反過嚟向她追討代通知金。到5月初，來自同中介公司嘅4位家傭及1位司機用不同理由提出集體辭職。司機喺在職期間，竟4次撞車。她哭訴說：「一個媽咪要湊住小朋友兼要做嘢好辛苦，工人咁走，完全冇畀時間我做準備，我同小朋友都有感情，點解佢哋會冇感情呢？」