任港姐導師贈佳麗貼士　向海嵐自稱唔算好嚴苛

更新時間：17:31 2021-05-21 HKT
發佈時間：17:30 2021-05-21 HKT

Anne與Vinci成為保健品牌旗下產品的代言人。

向海嵐（Anne）跟王賢誌（Vinci）昨日為保健品牌開幕禮擔任剪綵嘉賓，大會更即席宣布二人成為旗下產品代言人，不時獲讚凍齡有術的他們齊聲表示心態決定狀態，保持心境樂觀開朗是秘訣之一。Anne坦言在保養方面下了不少功夫，「其實去年全年疫情影響下，自己都比之前注重健康，即使每天點懶都堅持在家做30分鐘簡單運動，晚上6點後則戒食澱粉質，亦有食保健產品，畢竟有些Supplement是平日飲食中吸收唔到，咁啱呢個時候因為傾代言人，自己就試食產品一段時間，就係咁一拍即合，疫情加逆市，有工作當然好感恩。」

50歲的Vinci直言Keep住運動好重要，幸婚後未有出現「幸福肥」。

Anne與Vinci為保健品牌開幕禮擔任剪綵嘉賓。

對於新一屆港姐競選改以真人騷方式進行，安排佳麗與師姐一對一受訓，並會恢復出埠拍外景的環節，兼計劃於紅館舉行決賽，稍後擔任港姐導師的Anne說：「見佢哋今年咁重視香港小姐競選，當然好開心，佢哋有呢個構思好好，希望以過來人身份畀貼士師妹，我應該唔算係好嚴苛嘅導師。」至於舊作《無頭東宮》近日獲網民追捧，成為最想重播劇，她大表驚喜，又謂估不到網民會喜歡，「都成20年作品，自己睇番當時演技真係好差，有好多改進空間，不過作為集體回憶都OK。」

疫情下有工開，Anne和Vinci都好感恩。

雖然好多人婚後都會「幸福肥」，但Vinci跟另一半Kevin卻愈愛愈Fit，「我哋結婚就快五年，但大家一齊生活就已經好耐，拍拖時都試過有幸福肥問題，加上我飲食方面唔算好小心，好喜歡食煎炸及肥膩嘢，反而佢就好節制，雞皮一定唔食，做運動恆心又堅定過我，我有時太熱就推遲第二日先做，佢在身邊就不時鞭策我，見我食雞皮又『喝』止我，互相影響下，大家都有好多好嘅影響。」他又笑稱好在遺傳下手腳都瘦，所以望上去Fit啲。