「投訴」歌迷上載全損音質影片　張敬軒《Chill Club》獻唱慘變黐脷筋

更新時間：18:14 2021-04-26 HKT
發佈時間：15:45 2021-04-26 HKT

軒仔笑嘲影片壓縮後，自己把聲變成「黐脷筋」。

張敬軒（軒仔）最近走勻兩台的音樂節目，作客ViuTV音樂節目《Chill Club》的一集昨晚播出，靚聲當然令一班觀眾聽出耳油，仲有粉絲將他獻唱《黃色大門》一曲的片段，特意上載到YouTube同大家開心Share。不過，此舉似乎引起軒仔「不滿」，事關影片被壓縮至「Fi Fi」聲，其靚聲亦變成「黐脷筋」！軒仔昨晚在IG轉發該片，並以「你話人生究竟有幾無常？」為題，搞笑留言：「正當全世界都喺度玩緊高清影像、無損音質嘅時候。我親愛嘅歌迷大姑幫我po上youtube，竟然係360p、全損音質兼黐脷筋嘅Chill Club，以下讀『燒咳』。」

對於自己的歌聲被壓成「黐脷筋」，軒仔都覺得好好笑，仲不停回味。

被洗腦的軒仔今晨親身演繹「黐脷筋版」的《黃色大門》！

接着，軒仔抵死地扮「黐脷筋」腔續說：「喎茂撚過喎大呀次嗨ViuVeeVee嘅燒咳就梗讓茂左。」此句可翻譯為：「我冇諗過我第一次喺ViuTV嘅《Chill Club》就咁樣冇咗。」他又Hashtag「巧地地個口琴intro變_咗嗩吶」、「JoeyTangSir我對你哋唔字」、「條脷硬過我條命」，繼續爆笑向上傳影片的「經手人」投訴！搞到今朝，被洗腦的軒仔都忍唔住於IG Story，分享親身演繹的「黐脷筋版」《黃色大門》！對此，一班網民都紛紛留言笑嘲：「姐姐可能聽得明呢個版本呢」、「呢個version要上冠軍歌」、「軒公你d門牙漏風」、「笑到標眼水！」等。

軒仔壓縮版《黃色大門》：https://www.instagram.com/p/COGc2GEDo8v/