復工北上拍《倚天》黃浩然隔離期無所事事

更新時間：03:13 2020-05-13 HKT
發佈時間：12:30 2020-05-13 HKT

唔少粉絲提議他留在房間做運動。

喺疫情下，娛樂圈唔少台前幕後人員都食白果，等運到，演員有工開真係相當幸運，黃浩然屬幸運一群。隨着內地疫情緩和，王晶開拍嘅新版《倚天屠龍記》劇組亦告復工，片中飾演青翼蝠王的浩然前日北上為入劇組做定準備，不過因為中、港兩地檢疫問題，浩然和文詠珊（JM）一樣必需在酒店隔離14天。不過，呢個時勢有得搵人仔，就算忍受吓隔都好過冇得搵。

昨晚浩然喺社交網發文，相中身處酒店，戴住眼鏡，一臉風騷咬住枝探熱針，還留言：「隔離的第二天，每天兩次量度體溫！要搵啲嘢做下，大家有咩好提議？#黃仔的日常#隔離的日常」，鄭秀文、周柏豪都畀手瓜表情符號叫他加油，曹永廉留言：「兄弟！頂住！」有網民叫他開Live，有人叫他煲自己劇、追韓劇、唱歌、打機、做運動、做小手作送畀太太，當中以叫他開live居多。

其實金庸巨著《倚天屠龍記》多年來一直不停被拍成電影、劇集，王晶去年尾宣布再翻拍，以延續其1993年《倚天屠龍記之魔教教主》。片中由40歲的林峯演張無忌；文詠珊係周芷若；劉浩龍飾宋青書；朱晨麗演殷素素；古天樂飾張翠山，甄子丹飾張三豐；黃浩然做青翼蝠王。而黃浩然嘅青翼蝠王造型就嚇倒唔少網民，笑問黃浩然係咪得罪咗導演或造型師，搞到塊面白晒咁大整蠱！