晒行山照感謝疫情遭圍插　蔡嘉欣終跪低認錯：我無腦

更新時間：09:39 2020-04-22 HKT
發佈時間：15:15 2020-04-21 HKT

蔡嘉欣今日凌晨於Ig晒行山照。

抗疫期間，不少人選擇行山呼吸新鮮空氣，順道於社交網打卡「呃Like」，KOL出身的落選港姐蔡嘉欣也不例外，今日凌晨於Instagram（Ig）貼出一家去大欖涌水塘千島湖遠足的靚相，當中，除了有嘉欣穿Sports Bra露纖腰照外，她亦上載了跟兩位家人望湖的背影照，並寫道：「咁多年黎（嚟）從未同屋企人行過山，不過為了響應政府的限聚令，我地（哋）5人家庭，每次只能4人出動，繼上星期佢地（哋）4個自私行，今日終於成功賣甩我家姐……」

蔡嘉欣表示首次跟屋企人行山。

一家人仲不停影相打卡。

本來分享吓親子行山樂都幾溫馨，惟此Po一出卻引來大批網民炮轟，事關嘉欣於留言開首說：「感謝疫情，喚醒了我們家沉睡多年的運動基因……」然後仲要加個笑到喊emoji！由於新冠肺炎疫情持續擴散，至今全球確診病例已破247萬，死亡人數近17萬，消息令人哀痛，無奈嘉欣卻表示「感謝疫情」，難免觸動網民神經，不少人怒插她：「死咗咁多人，仲要感謝呢個疫情？就係因為喚醒你做運動？？Like唔係咁呃的吧？」、「醫護做到搵命搏，作為公眾人物唔鼓勵人Stayhome，仲感謝疫情畀你去行山，冇品定冇腦」等。

對於有網民指她「針未咭到肉」，並假設：「未有你身邊人確診然後死，有嘅話睇吓你講唔講得出發放乜嘢正能量……」嘉欣又寸寸貢說：「前排我身邊也有朋友家人確診，我也因此隔離，我還是感謝疫情，讓我可以留在家2星期整頓自己的思想，如果感謝疫情，感謝2字就是你心目中的輕視、惡毒、帶有咀咒思想……ok，沒辦法，只希望你以後能活得開心輕鬆一點。」

不過蔡嘉欣留言話：「感謝疫情，喚醒了我們家沉睡多年的運動基因……」

隨即激發網民怒插她使用「感謝」一詞不當。

同時，亦有人好心提點：「應該改為『因為疫情』，用感謝疫情不好，疫情死咗好多人。」惟嘉欣繼續死撐：「選擇寫感謝疫情，沒有要看輕疫情嚴重性的意思，只是想表達，在艱難的疫情下，我們還是可以找到值得感謝感恩的事，勉勵大家在逆境中依然能有好的心態，保持正能量。」不過，未知是否見群情洶湧呢？剛才有網民寸她「死唔認錯」，嘉欣終跪低回覆：「我認錯，我無腦，我唔應該用感謝2字，令大家曲解了。」剛才她更將原Po留言改為「這段日子，喚醒了我們家沉睡多年的運動基因……」