【頭條戲場】《超級無敵羊咩咩大電影之天外飛咩》阿爽愈嚟愈好戲

更新時間：00:42 2019-12-27 HKT
發佈時間：00:00 2019-12-27 HKT

LU-LA好快搵返飛船，但當然無咁容易可以返到屋企。

25年前，阿爽 (Shaun the Sheep)只係茄喱啡，負責喺《超級無敵掌門狗》(Wallace and Gromit)中過場。今時唔同往日，15年憑電影《超級無敵羊咩咩大電影之咩最勁》(SHAUN THE SHEEP MOVIE)分別獲提名金球獎及奧斯卡最佳動畫，全球票房大收8千幾萬美元，阿爽明顯已成世界級一線明星。雖然好紅，但阿爽個老竇即創作團隊無食老本，新作《超級無敵羊咩咩大電影之天外飛咩》帶阿爽上太空，泥膠定格動畫加科幻元素相當高質，致敬《2001太空漫游》加《ET外星人》及好多經典科幻片場景，小朋友睇羊睇得開心，我睇「黐線爽」亦睇得好快樂。（剛上映）撰文：廖思慧

農場出現麥田怪圈，農場主人唔知點算好。

農場主人睇報紙知道好多人對外星人有興趣，諗到有大商機。

典型定格動畫（stop-motion animation）《超級無敵羊咩咩大電影之天外飛咩》由英國著名動畫公司阿德曼（Aardman Animations）製作，（註︰所謂「定格動畫」，是利用相機將每幀不同的圖像拍攝，拍攝對象為木偶或泥膠公仔，然後連續播放，從而產生動畫效果。）而阿德曼擅長製作以泥膠公仔為主的定格動畫，著名作品有《超級無敵掌門狗》系列及《咪走雞》等。
　　
黐線羊阿爽係一堆羊咩咩嘅大佬，負責諗嘢玩同搵嘢食，有勇有謀超鬼馬。農場保安牧羊犬肶肶負責睇住農場同𥄫住阿爽，唔畀阿爽玩飛碟咩，阿爽會即刻諗到玩第二樣嘢，玩收割車玩空中飛羊，你禁一樣佢再諗第二樣，你咪禁囉。有一日，又藍又閃嘅外星人LU-LA意外穿越銀河系誤墮農場，阿爽同LU-LA雖然雞同鴨講，但因為啱玩好快成為密友，兩隻嘢喺農場玩到癲，而阿爽為助LU-LA返回星球搞到市區亂晒籠，同時間，專捉外星人的特工Red趕到，完全係動畫版《ET外星人》，拍得可愛亦好好笑，結局有洋蒽好溫暖，最重要阿爽今次勁好戲。

農場主人將農場改裝為外星樂園搵快錢，每位人頭30歐元。

因為一個心結，邪惡特工專捉外星人。

兩位導演的夢想
聯合導演李察菲蘭和威爾比察表示，《超級無敵羊咩咩大電影之天外飛咩》不僅是電影，更是兩人的夢想。菲蘭笑着說：「老實講，都有好多噩夢般嘅時刻，但一切都值得。」比察透露創作有好大的挑戰，因為有無限可能性，另外因為角色無對白，有些規則亦要跟隨。「我哋要令到角色有趣又好玩，我就係鍾意咁樣嘅創作。」對於能夠創作新類型電影，菲蘭表示美術部所有人都好興奮，「因為佢哋可以盡情發揮科幻諗頭，每個人都已做好準備，創作有史提芬史匹堡的影子，又有史丹力寇比力克味道嘅電影，總之科幻題材就好似一個大百寶袋。」