【头条戏场】《超级无敌羊咩咩大电影之天外飞咩》阿爽愈嚟愈好戏

更新时间：00:42 2019-12-27 HKT
发布时间：00:00 2019-12-27 HKT

LU-LA好快揾返飞船，但当然无咁容易可以返到屋企。

25年前，阿爽 (Shaun the Sheep)只系茄喱啡，负责喺《超级无敌掌门狗》(Wallace and Gromit)中过场。今时唔同往日，15年凭电影《超级无敌羊咩咩大电影之咩最劲》(SHAUN THE SHEEP MOVIE)分别获提名金球奖及奥斯卡最佳动画，全球票房大收8千几万美元，阿爽明显已成世界级一线明星。虽然好红，但阿爽个老窦即创作团队无食老本，新作《超级无敌羊咩咩大电影之天外飞咩》带阿爽上太空，泥胶定格动画加科幻元素相当高质，致敬《2001太空漫游》加《ET外星人》及好多经典科幻片场景，小朋友睇羊睇得开心，我睇「黐线爽」亦睇得好快乐。（刚上映）撰文：廖思慧

农场出现麦田怪圈，农场主人唔知点算好。

农场主人睇报纸知道好多人对外星人有兴趣，谂到有大商机。

典型定格动画（stop-motion animation）《超级无敌羊咩咩大电影之天外飞咩》由英国著名动画公司阿德曼（Aardman Animations）制作，（注︰所谓「定格动画」，是利用相机将每帧不同的图像拍摄，拍摄对象为木偶或泥胶公仔，然后连续播放，从而产生动画效果。）而阿德曼擅长制作以泥胶公仔为主的定格动画，著名作品有《超级无敌掌门狗》系列及《咪走鸡》等。
　　
黐线羊阿爽系一堆羊咩咩嘅大佬，负责谂嘢玩同揾嘢食，有勇有谋超鬼马。农场保安牧羊犬肶肶负责睇住农场同𥄫住阿爽，唔畀阿爽玩飞碟咩，阿爽会即刻谂到玩第二样嘢，玩收割车玩空中飞羊，你禁一样佢再谂第二样，你咪禁啰。有一日，又蓝又闪嘅外星人LU-LA意外穿越银河系误堕农场，阿爽同LU-LA虽然鸡同鸭讲，但因为啱玩好快成为密友，两只嘢喺农场玩到癫，而阿爽为助LU-LA返回星球搞到市区乱晒笼，同时间，专捉外星人的特工Red赶到，完全系动画版《ET外星人》，拍得可爱亦好好笑，结局有洋蒽好温暖，最重要阿爽今次劲好戏。

农场主人将农场改装为外星乐园揾快钱，每位人头30欧元。

因为一个心结，邪恶特工专捉外星人。

两位导演的梦想
联合导演李察菲兰和威尔比察表示，《超级无敌羊咩咩大电影之天外飞咩》不仅是电影，更是两人的梦想。菲兰笑着说：「老实讲，都有好多噩梦般嘅时刻，但一切都值得。」比察透露创作有好大的挑战，因为有无限可能性，另外因为角色无对白，有些规则亦要跟随。「我哋要令到角色有趣又好玩，我就系钟意咁样嘅创作。」对于能够创作新类型电影，菲兰表示美术部所有人都好兴奋，「因为佢哋可以尽情发挥科幻谂头，每个人都已做好准备，创作有史提芬史匹堡的影子，又有史丹力寇比力克味道嘅电影，总之科幻题材就好似一个大百宝袋。」