【頭條戲場】《鬼影特攻：以暴制暴》由頭炸到尾有錢真好

更新時間：14:05 2019-12-20 HKT
發佈時間：00:00 2019-12-20 HKT

Ryan Reynoldso係大佬一號，有勇有謀但份人好盟塞。

電影由Michael Bay執導，Ryan Reynolds主演，放在Netflix實在有啲浪費，因為電影耗資1.5億美金製作，打頭陣接近20分鐘意大利瘋狂飛車撞死人畫面睇到我瞬間精神晒，之後還有大量重型爆炸場口，絕對係由頭炸到尾，劇情唔算弱雞，緊張刺激又血有性感場口仲有靚仔睇，商業片嚟講精彩度絕對滿分。(Netflix已上架)撰文:廖思慧

除咗不斷撞到人，車內其實有特工受傷要急救，車內車外都要同時間競賽。

一班特工要去香港救人，唔好深究「都唔似香港嘅」。

地球上有六個人，個個身懷超勁本領，佢哋除咗叻，仲有共同志向，就係想將自己嘅過去Delete改變未來。咁啱有一位有錢人，佢叫一號，召集到六位勁人去組成一個神秘組織。組織有咩做?就係申張正義，將世界上所有壞人私下幹掉，簡稱「私了」，但呢個「私了」唔講得笑，會死人嘅。點解一號要咁做?佢覺得名字係死嘅，就算有一日佢同所有同伴嘅名被遺忘，但世人都會永遠記得佢哋所做嘅事。

係無乜冷場嘅
戲中Ryan Reynolds好揪得，不但飛簷走壁，更要高空懸吊，其實各特工都有好身手，特別係四號(Ben Hardy飾)，係因咩差事跳跳跳嘅終極火山級版本，睇佢喺幾十層高空逐層跣落地下，又喺吊臂上逃生，喺IMAX睇應該會出晒汗。新聞稿話電影「鬥智鬥力的緊湊劇情令本片絕無冷場」，劇情的確好緊湊，但鬥智又唔太覺得。

打到爆頭爆眼
電影分三Part高潮，第一Part喺開場嘅首20分鐘意大利瘋狂飛車，開戲睇前好眼瞓，睇完飛車精神晒，真人真事呀。之後兩Part分別係香港拯救行動及尾段郵輪打大佬，全程打到癲，吓吓爆頭又爆眼，睇得好過癮。文戲嘛?弱嘅，但重要咩?