【找數真漢子】郭富城履行24年前承諾代市民捐利是錢

更新時間：22:58 2018-02-20 HKT
發佈時間：17:40 2018-02-20 HKT

城城抱抱財神

郭富城去年榮升人父，囡囡Chant都5個月大了，他在年卅晚被TVB「翻舊帳」，原來1994年他接受祝文君訪問時豪氣講過：「我希望將來結婚派利是，個個都有份，我講過嘅，全港市民都會收到我嘅利是！」令不少網民集氣叫城城找數。

今日城城出席新春活動，提及派利是一事，他笑指廿幾年前的他真的是小朋友，現在成家立室是大人，開心謂：「我找數！」作為找數真漢子的他稱：「有個問題，逐家逐戶派利是冇可能發生，所以我想將全港市民嘅利是集埋一封，將呢筆錢捐出去。希望分享呢個福氣，代表全香港市民，去傳承落去，好唔好呀？希望更多人受惠，香港市民唔介意啦。」城城計劃將利是錢捐給聯合國兒童基金會，充滿心意。

與囡囡度過首個新年的城城滿面幸福，分享喜悅指屋企多了個小朋友真的特別熱鬧和開心，與未結婚時是兩個完全不同的世界，快樂了很多，感受到生活可以好簡單，最重要是快樂和健康。他又指郭媽媽都很開心，還常跟他說：「你睇你個女幾得意，快追返個仔喇！媽媽抱孫女都不夠，還想抱孫仔，而我們好孝順的，會盡量努力，但也要順其自然。其實現在不管工作多辛苦，回家立即感到好溫馨，有個BB已經好圓滿，湊埋個好字就滿上加滿、盤滿砵滿！現代社會有一仔一女已足夠，但如果老婆唔怕辛苦都可生多幾個。」

為了陪前世和現世情人，城城稱今次是10年來放最長的1次年假，好好享受家庭樂。他透露在家有幫手餵囡囡食糊仔，下一個目標是帶囡囡出街或去公園，還有一項大挑戰就是幫囡囡沖涼，因怕自己唔覺意會太大力整傷囡囡。城城謂有次看到老婆幫囡囡沖涼時，囡囡飲了啖水嗆到，所以他暫時不敢幫手沖涼。他在現場大派利是之餘，也代囡囡收到許多利是，他分享小秘密說：「講個笑話畀大家知，老婆話為囡囡儲起利是錢作為將來的嫁妝。」