8年前做女狀元　麥明詩：也不就在一間大機構打工

更新時間：16:54 2017-07-12 HKT
發佈時間：15:00 2017-07-12 HKT

麥明詩當上2015年度港姐冠軍後，在TVB「打工」。

今日係DSE放榜日，有人歡喜有人垂淚。唔少藝人都以自身經歷勉勵考生，一次考試並非定輸贏，「成功」對每個人嘅定義唔同，最緊要全力以赴。「十優港姐」麥明詩8年前經歷會考放榜，成績優異嘅佢劍橋法律系畢業，高學歷似乎就係人生大贏家。回想當年收到10A會考成績，佢感言：「考到好的成績並不代表一生生活美滿，因為當我真的實現到一個追求已久的目標時，才發覺那份喜悅只是一瞬。甜蜜的時光反而是奮鬥的過程；與書友一早到自修室排隊攞位而打的那個哈欠、做完past paper伸的那個懶腰、上完學太累甜睡的那個能量盹...」

許廷鏗勉勵考生。

麥明詩坦言「成功」過後，人生有更多挑戰，考到狀元，都係喺大機構打工（即TVB），與不同學業背景嘅同事在同一個平台努力工作。她說：「考到好的成績當然是好事，但絕不可以怠慢。成績未如理想，絕不要灰心，因為你不比那些『成功考生』差很多。生命是一個充滿驚喜的旅途，而不是一個結果。追求『成功』的路是無窮無盡，所以唯有懂得享受沿途美景，才會得到滿足。這，是我每天提醒自己的。」

另一位高材生許廷鏗香港大學牙醫學士課程畢業，已掛牌做牙醫，最近過檔華納做一哥。佢上載童年照，隔空撐考生：「知到（道）大家等dse放榜等到好似我咁呆左（咗）喇～無論成績點都好，自問自己努力過就值得為自己拍拍膊頭仔，俾（畀）自己多啲鼓勵」。