祖馬龍心水│「準輝煌」出頭良機
更新時間：19:01 2025-10-03 HKT
發佈時間：19:01 2025-10-03 HKT
發佈時間：19:01 2025-10-03 HKT
字體大小
現今世代騙案處處，話說有朋友收到投資陷阱電話，對方先叫朋友畀一百蚊，當任務完成後，可連本帶利收番二百。唔知係咪睇得多《東張西望》，朋友對騙徒手法瞭如指掌，所以攞番二百之後就即刻block咗對方電話割禾青。眼見偷雞唔成，騙徒就用其他太空卡再度聯絡朋友，希望可以喺佢手上重奪被反欺詐嘅一舊水。當電話接上後，騙徒打算用同一手法給朋友一百蚊獎金，先博取信任，豈料後續故事還未發生，朋友即醒目地block咗騙徒，前後袋咗兩嚿水不了了之。本人表示驚嘆之餘，亦深感物以類聚、人以群分，感覺上同祖馬龍熟悉嘅朋友都有番咁上下蠱惑嘅基因！
今期心水「準輝煌」一樣咁多嘢諗，呢匹馬抽檔一向欠運，上季季尾更連續抽出數仗排大外檔，成單騙案咁！小道消息話，接連劣檔激到馬主彈起，有日排位朝，馬主專誠去馬會總部監察抽檔嘅程序。今次終於抽一檔，此駒近期晨課快跳亦Sharp醒，八月尾試閘含蓄，撳住唔試晒畀你睇，狀態唔錯之下，今次係出頭良機。
第六場 4 準輝煌 1 美麗邂逅 13 凱旋幸運
第九場 3 燈胆將軍 2 膨才 5 寶進
