亨利拆局│練馬師王吼希斯

更新時間：02:00 2023-05-24
發佈時間：02:00 2023-05-24

上期沙田日賽希斯出馬十匹，陣容似模似樣，我曾一度考慮捧其練馬師王，不過翻查資料，發現佢今季只曾一次封王，當堂嚇一跳，最終才改變主意推介蔡約翰，事後證明決定正確。不過，今次我準備向盲門挑戰一下，事關普遍馬房都揀唔落手，本來黎昭昇是理想選擇，缺點則是賠率乏味，衡量過馬匹實力與分頭之後，即管畀一次機會希斯。

第二場「天外驚天」兩季共十四戰仍未開齋，質素好極有限，不過現居五班跑谷草一千，賽事級數已最低了，前仗能在四班偏強組別只輸兩乘許，伸算在此綽綽有餘，配戴文高可馬帶人返。

第四場「佳運發」近兩仗打雨戰俱接近，預期今晚又有雨，可睇高一綫。第五場「健康第一」拼至六歲仍是處女馬，對佢再無寄望，不過近期連番交出追勢，田泰安亦騎慣騎熟，希望有形勢配合。第六場「人和家興」上仗賺慢步速放返，但當日下半場較有利後追，本身贏馬水準不宜睇小。

第七場「勇眼光」近期例衝一段，今仗可能開快步速，有權追近。第九場「赤馬雄風」上仗直路貼欄屬不利路段，輸一乘許算有瞄頭。

目標：希斯

賠率：3.75

立即下載 | 全新《星島頭條》APP : https://bit.ly/3yLrgYZ