10歲愛拍片男孩無後製直出拍片 分享日常無懼惡評：「黑粉都係粉」｜數位學習
發佈時間：07:15 2026-08-26 HKT
數位學習｜大家好，我叫Adam，一個升小六平平凡凡嘅男仔，有少少靚仔（笑），今年10歲，鍾意Pokémon和iPAD內的《Roblox》Games，有個老best姓鄧，可以叫佢鄧同學。（佢靚仔定你靚仔？）哈哈！唔識答。
今年4月，我請媽咪幫忙開咗個IG（@bacon_cat_2015a），因為四年級時有個同學，（鄧同學？）係呀，佢開咗個YouTube Channel，即係我都可以開YouTube Channel喎，於是上載咗幾條打機片，雖然無咩人睇，但我已經好開心！我想同更多人分享，所以想試下開個IG，問咗相熟老師意見，佢話媽咪ok就可以（咁你都幾乖啊！）OK啦！
10歲男孩成Content Creator 無後製直接出片
最初IG只係放相，都係我鍾意嘅Pokémon卡，希望同多啲人交流，後來有一位老師加咗我個IG，我就諗如果佢見到我扮老師鬧人，會唔會好搞笑呢？每所學校嘅老師鬧人都應該差唔多樣，所以我就拍咗呢條片，亦係IG第一條片，估唔到真係有人留言。（媽媽知道後有咩反應？）無咩呀，不過媽媽最初以為我拍片係放落WhatsApp group。平時响自己房間或上隔床用手機拍片，諗到咩就拍咩，都無寫稿或度好多嘢，拍完馬上出，無睇play back、無後製，直接出片！真係諗到咩就拍咩，以前試過同鄧同學拍雙人打機YouTube片，但只係拍螢光幕，嗰陣我唔識剪片。（依家呢？）依家我識用Cap Cut啦，仲幫鄧同學剪打機片，剪咗幾個鐘加晒字幕，放番响佢個Channel。
無懼黑粉：「黑粉都係粉絲！」
試過有人DM，無緣無故咁鬧我、笑我或者話我拍埋啲無聊嘢，最初都會反駁，依家直接刪除，無謂同佢哋拗。我無唔開心，接受到嘅，因為佢哋講嘅嘢無事實根據，但都有話畀爸爸媽媽知，而且黑粉都係粉絲，佢哋無處不在。都有粉絲讚我㗎！留言話我好好笑，好記得有一個留言鼓勵我考好呈分試，又有啲粉絲會催我快啲出新片 —— 見到呢啲係好開心嘅。
其實拍片都無諗過要做KOL，反而想做YouTuber，做邊類型？咪都係Pokémon同埋打機囉。自己最鍾意嘅YouTuber係笑波子同彤哥，佢哋兩個都鍾意打機、Pokémon、扭蛋，彤哥仲有勁多收藏，全部都係Pokémon卡，睇到都開心。平時仲有睇台灣嘅YouTuber「有感筆電」（台灣百萬YouTuber，主要拍《Roblox》與《Minecraft》的遊戲實況影片）打機，佢一年前嚟咗香港行葵廣，可惜我去唔到，哎！
後記：畢竟只是10歲仔，初見時有點I，告訴記者最初收到訪問邀請，第一時間問鄧同學是否騙案？最後由媽媽負責聯絡 —— 係真㗎，仔！由於IG規定年滿13歲才可建立個人帳戶，所以Adam的帳戶是經媽媽的帳戶所開設，好處是發布任何內容，媽媽都會收到通知，方便監管。「知道仔仔只係想同人哋分享，所以至答應開IG。」
平衡學業與趣 滿意的呈分試
Adam其中一條最多人睇的Reels，是「控訴」噪音影響他溫習中文呈分試，鏡頭前的他嬲爆爆，但神情可愛，引得著名KOL「關門」留言「希望你呈分試考到好成績！你好Q（cute）！」
問他呈分試考成點？「好滿意，我滿意數學同常識咋，（中文呢？）還可以（笑）。」問了爸媽，滿意的。
文：劉佩樺 圖：陳仲樑、受訪者提供
