10岁爱拍片男孩无后制直出拍片分享日常无惧恶评：「黑粉都系粉」｜数位学习

更新时间：07:15 2026-08-26 HKT
发布时间：07:15 2026-08-26 HKT

数位学习｜大家好，我叫Adam，一个升小六平平凡凡嘅男仔，有少少靓仔（笑），今年10岁，钟意Pokémon和iPAD内的《Roblox》Games，有个老best姓邓，可以叫佢邓同学。（佢靓仔定你靓仔？）哈哈！唔识答。

今年4月，我请妈咪帮忙开咗个IG（@bacon_cat_2015a），因为四年级时有个同学，（邓同学？）系呀，佢开咗个YouTube Channel，即系我都可以开YouTube Channel㖞，于是上载咗几条打机片，虽然无咩人睇，但我已经好开心！我想同更多人分享，所以想试下开个IG，问咗相熟老师意见，佢话妈咪ok就可以（咁你都几乖啊！）OK啦！

升小六的Adam，平日爱自拍Reels。（图：陈仲梁）

10岁男孩成Content Creator 无后制直接出片

最初IG只系放相，都系我钟意嘅Pokémon卡，希望同多啲人交流，后来有一位老师加咗我个IG，我就谂如果佢见到我扮老师闹人，会唔会好搞笑呢？每所学校嘅老师闹人都应该差唔多样，所以我就拍咗呢条片，亦系IG第一条片，估唔到真系有人留言。（妈妈知道后有咩反应？）无咩呀，不过妈妈最初以为我拍片系放落WhatsApp group。平时响自己房间或上隔床用手机拍片，谂到咩就拍咩，都无写稿或度好多嘢，拍完马上出，无睇play back、无后制，直接出片！真系谂到咩就拍咩，以前试过同邓同学拍双人打机YouTube片，但只系拍萤光幕，𠮶阵我唔识剪片。（依家呢？）依家我识用Cap Cut啦，仲帮邓同学剪打机片，剪咗几个钟加晒字幕，放番响佢个Channel。

10岁男孩成Content Creator 无后制直接出片（图：陈仲梁）

无惧黑粉：「黑粉都系粉丝！」

试过有人DM，无缘无故咁闹我、笑我或者话我拍埋啲无聊嘢，最初都会反驳，依家直接删除，无谓同佢哋拗。我无唔开心，接受到嘅，因为佢哋讲嘅嘢无事实根据，但都有话畀爸爸妈妈知，而且黑粉都系粉丝，佢哋无处不在。都有粉丝赞我㗎！留言话我好好笑，好记得有一个留言鼓励我考好呈分试，又有啲粉丝会催我快啲出新片 —— 见到呢啲系好开心嘅。

「黑粉都系粉丝，佢哋无处不在。都有粉丝赞我㗎！」（图：陈仲梁）

其实拍片都无谂过要做KOL，反而想做YouTuber，做边类型？咪都系Pokémon同埋打机啰。自己最钟意嘅YouTuber系笑波子同彤哥，佢哋两个都钟意打机、Pokémon、扭蛋，彤哥仲有劲多收藏，全部都系Pokémon卡，睇到都开心。平时仲有睇台湾嘅YouTuber「有感笔电」（台湾百万YouTuber，主要拍《Roblox》与《Minecraft》的游戏实况影片）打机，佢一年前嚟咗香港行葵广，可惜我去唔到，哎！

「最钟意嘅YouTuber系笑波子同彤哥！」（图：陈仲梁）

后记：毕竟只是10岁仔，初见时有点I，告诉记者最初收到访问邀请，第一时间问邓同学是否骗案？最后由妈妈负责联络 —— 系真㗎，仔！由于IG规定年满13岁才可建立个人帐户，所以Adam的帐户是经妈妈的帐户所开设，好处是发布任何内容，妈妈都会收到通知，方便监管。「知道仔仔只系想同人哋分享，所以至答应开IG。」