母親節︳小朋友想跟媽媽說卻又不敢說…… 「你整嘅糕好硬！」、「唔好成日匿喺屋企」

母親節︳又來到一年一度的母親節，在這個向母親表達感謝和愛意的溫馨時刻，孩子們跟媽媽說得最多的莫過於「我愛你」。然而，除了「我愛你」，孩子們還有哪些想說又不敢說的心底話？趁着母親節，一起來看看中華基督教會基法小學及天主教伍華小學同學的小孩心聲，窺探小朋友內心對母親的真實想法。

小三劉心恬：「你整嘅糕好硬，但我感受到你努力。」 

媽媽遺傳咗外婆嘅廚藝，煮嘢好好食，最鍾意食花糕（一款花朵形狀的傳統糕點），但佢落得太多麵粉，無外婆整得咁好味。雖然好硬，不過媽媽每次問我好唔好食，我都只會話繼續努力，唔敢講真話，怕打擊佢。

小三廖涵晞：「想要多啲支持同鼓勵。」 

雖然久不久會激嬲媽咪，但都想要多啲支持同鼓勵。其實有時都知自己做錯咗或者做得唔好，例如依家媽咪幫我安排咗一啲英文網上補習班，但好多內容學校老師上堂嗰陣已經教過，有時覺得自己仲叻過網課嗰老師，好似嘥咗媽咪啲錢，不過我知道媽咪係為咗我好，所以就算上到好悶都唔敢出聲，驚佢嬲同唔開心。

小三馬子軒：「唔好成日匿喺屋企。」  

因為媽咪成日匿埋喺屋企，我知道有時就算有人約佢，佢都寧願推咗人留喺屋企陪我，但呢個時候我就會捉佢落街打羽毛球，郁動下。佢成日話自己無嘢做，跟住我就會答「你咪家庭主婦囉！」，佢煮嘢好好食！無論如何，佢都係我心目中嘅英雄，仲記得初初轉校嚟嘅時候佢成日陪住我，無佢嘅話，我可能唔會咁快適應到。

小六唐樂兒：「如果我可以自行保管手機就好喇！」 

我同媽咪關係好好，每日都會傾計，乜都會同佢講。喺我心目中，佢就好似一本人肉字典，好勤力。當我做錯嘢佢會同我講點樣做返啱，有嘢唔識嘅時候都會教我，仲勁過Google、ChatGPT、DeepSeek，因為佢嘅講解唔係冷冰冰，而係有感情。最重要係媽媽喺側邊嘅時候唔可以隨時隨地攞手機出嚟，不過依家有時都會公然違抗佢嘅命令。

小六張愷桐：「做到真正嘅一視同仁。」

激嬲媽咪嗰陣，通常都係講乜錯乜，火上加油。記得有次我拎利是錢買咗兩包媽咪麵，跟住媽咪要求我同阿妹分享，因為佢好講求公平，成日都想一視同仁，每次買嘢畀我哋基本上都係兩個都有份，但佢唔記得咗包媽咪麵係用我嘅利是錢買㗎！我希望媽咪明白如果阿妹要食嘅話其實可以用阿妹自己嘅利是錢，就算另外買畀阿妹我都唔會覺得偏心，而唔係直接拎我嘅零食。

小五 龍韻如：「冇乜唔夠膽講。」

已經習慣咗有咩都會同媽咪講，學校嘅八卦都唔例外，譬如A同學鍾意B同學，因為同佢相處咗咁耐，好放心，唔使驚佢會話畀其他同學知。我哋之間就好似有心靈相通，試過有次搵唔到件衫，然後媽咪反咗個白眼，我向佢嘅眼神方向望過去就見到我件衫。雖然有時我會粗心大意，但我知道媽咪係呢個世界上少數可以無條件包容我、愛護我、第一時間幫我解決問題嘅人。佢就好似一條金魚，得七秒記憶，無論我做錯啲乜嘢，佢都好快當冇事發生、原諒我。

小三彭泰琛：「對唔住，下次會努力溫書。」 

如果有一日假期可以同媽咪一齊過，我會想同佢睇電影，因為幾次睇電影媽咪都無一齊，只有家姐、爸爸。雖然媽咪平日要返工，陪我嘅時間唔多，但佢都堅持每日送我返學。另外，媽咪收工後會督促我快啲溫書，但我有時都係敷衍咁答「知道啦！」，最後出到嚟得40幾分，唔合格，搞到佢好嬲。除咗唔溫書、考試低分，媽咪好少鬧我，所以我都想同佢道歉，承諾下次會努力溫書。

小四陳慧嘉：「放假玩夜啲都唔怕啦！」 

我會形容媽咪係獅子同兔仔嘅混合體。喺我唔小心撞到或者整到人嘅時候，佢會幫我同人道歉，就好似獅子咁勇敢；但有時又會好似兔仔咁溫柔，例如我玩得太耐遊戲，佢會溫柔咁提醒：「休息下，唔好玩咁耐，隻眼會好攰。」好有耐心勸我。有時放假玩到12點幾，佢都會忍唔住話：「好夜啦，要瞓啦，唔係聽日又瞓到好晏先起身。」通常嗰陣我心入面就會諗「既然放假，都想玩耐啲」，不過呢個時候其實都眼瞓，所以都會聽媽咪話，先瞓覺，第二日再玩。

小四何楸恩：「畀多少少時間同耐性聽我講嘢。」

最想同媽咪講「我好愛佢」，平時唔會講因為覺得佢唔會聽，怕佢覺得我煩，阻住佢做嘢。佢好忙，收工返到屋企已經差唔多八點半，所以無乜時間陪我。最記得細個佢帶過我去海南島嘅三亞旅行，嗰次好難得佢完全放低工作，全心全意咁陪咗我成個禮拜，我哋做咗好多嘢，食嘢、玩沙、執貝殼。我知道有時佢惡、鬧我都係為咗我好，就好似原本識嘅題目因為自己粗心大意而做錯，其實都係想我下次唔好再犯，不過如果可以多啲耐性就好啦！

小二橫村天祐：「鍾意你，多謝你嘅愛護。」 

同其他同學仔唔一樣，我係中日混血兒，媽咪係香港人，爹哋係日本人。平時喺屋企同媽咪用廣東話，同爹哋就用日文溝通，我嘅廣東話或者有時中文功課唔識都係媽咪教我。媽咪通常送完我返學就返工，返四個鐘，12點半收工，再接我放學，好頻撲，所以都想同佢講「鍾意媽咪，多謝你嘅愛護」。或者因為我係男仔，之前一直都唔好意思當面講，嚟緊母親節可能會寫張卡畀佢表達自己嘅心意。

小一喬祉允：「想去海洋公園玩。」 

唔敢同媽咪講係因為有時佢會話「no」，同埋估到佢會拒絕。雖然想去海洋公園玩，但我已經唔敢問媽咪可唔可以去同點解唔可以去。記得舊年去海洋公園可以睇到熊貓，佢哋真係好可愛、好搞笑。仲有水母、鯊魚，我最驚鯊魚，好彩有啲玻璃隔住。

小一Ferraris Tiana Marie：「買一隻高過我嘅大狗。」 

Tiana呢個名係媽咪搵佢老師幫我改嘅，媽咪係菲律賓人，所以我無中文名。我都係最想同媽咪去海洋公園睇熊貓，因為之前去過兩次都睇唔到；仲想養一隻好大嘅狗，高過我，喺YouTube見過。雖然媽咪同我都好鍾意動物，但我知道佢搵錢好難，又要照顧我同哥哥，屋企仲有兩隻貓，所以無同佢講。其實媽咪好好，雖然佢能力有限，但都會盡量滿足我。

文：林詩敏

圖：PhotoAC、林詩敏、部分由受訪者提供

相關文章︳小朋友話你知農曆新年最想做的是…「過年唔好講讀書」、孝順仔想「幫嫲嫲買腸粉」︳親子熱話

相關文章︳小朋友最想要的聖誕禮物是…想跟哈利波特一起冒險？去澳洲過夏日聖誕︳親子熱話