母亲节︳小朋友想跟妈妈说却又不敢说…… 「你整嘅糕好硬！」、「唔好成日匿喺屋企」

母亲节︳又来到一年一度的母亲节，在这个向母亲表达感谢和爱意的温馨时刻，孩子们跟妈妈说得最多的莫过于「我爱你」。然而，除了「我爱你」，孩子们还有哪些想说又不敢说的心底话？趁着母亲节，一起来看看中华基督教会基法小学及天主教伍华小学同学的小孩心声，窥探小朋友内心对母亲的真实想法。

小三刘心恬：「你整嘅糕好硬，但我感受到你努力。」 

妈妈遗传咗外婆嘅厨艺，煮嘢好好食，最钟意食花糕（一款花朵形状的传统糕点），但佢落得太多面粉，无外婆整得咁好味。虽然好硬，不过妈妈每次问我好唔好食，我都只会话继续努力，唔敢讲真话，怕打击佢。

小三廖涵晞：「想要多啲支持同鼓励。」 

虽然久不久会激嬲妈咪，但都想要多啲支持同鼓励。其实有时都知自己做错咗或者做得唔好，例如依家妈咪帮我安排咗一啲英文网上补习班，但好多内容学校老师上堂𠮶阵已经教过，有时觉得自己仲叻过网课𠮶老师，好似嘥咗妈咪啲钱，不过我知道妈咪系为咗我好，所以就算上到好闷都唔敢出声，惊佢嬲同唔开心。

小三马子轩：「唔好成日匿喺屋企。」  

因为妈咪成日匿埋喺屋企，我知道有时就算有人约佢，佢都宁愿推咗人留喺屋企陪我，但呢个时候我就会捉佢落街打羽毛球，郁动下。佢成日话自己无嘢做，跟住我就会答「你咪家庭主妇啰！」，佢煮嘢好好食！无论如何，佢都系我心目中嘅英雄，仲记得初初转校嚟嘅时候佢成日陪住我，无佢嘅话，我可能唔会咁快适应到。

小六唐乐儿：「如果我可以自行保管手机就好喇！」 

我同妈咪关系好好，每日都会倾计，乜都会同佢讲。喺我心目中，佢就好似一本人肉字典，好勤力。当我做错嘢佢会同我讲点样做返啱，有嘢唔识嘅时候都会教我，仲劲过Google、ChatGPT、DeepSeek，因为佢嘅讲解唔系冷冰冰，而系有感情。最重要系妈妈喺侧边嘅时候唔可以随时随地攞手机出嚟，不过依家有时都会公然违抗佢嘅命令。

小六张恺桐：「做到真正嘅一视同仁。」

激嬲妈咪𠮶阵，通常都系讲乜错乜，火上加油。记得有次我拎利是钱买咗两包妈咪面，跟住妈咪要求我同阿妹分享，因为佢好讲求公平，成日都想一视同仁，每次买嘢畀我哋基本上都系两个都有份，但佢唔记得咗包妈咪面系用我嘅利是钱买㗎！我希望妈咪明白如果阿妹要食嘅话其实可以用阿妹自己嘅利是钱，就算另外买畀阿妹我都唔会觉得偏心，而唔系直接拎我嘅零食。

小五 龙韵如：「冇乜唔够胆讲。」

已经习惯咗有咩都会同妈咪讲，学校嘅八卦都唔例外，譬如A同学钟意B同学，因为同佢相处咗咁耐，好放心，唔使惊佢会话畀其他同学知。我哋之间就好似有心灵相通，试过有次揾唔到件衫，然后妈咪反咗个白眼，我向佢嘅眼神方向望过去就见到我件衫。虽然有时我会粗心大意，但我知道妈咪系呢个世界上少数可以无条件包容我、爱护我、第一时间帮我解决问题嘅人。佢就好似一条金鱼，得七秒记忆，无论我做错啲乜嘢，佢都好快当冇事发生、原谅我。

小三彭泰琛：「对唔住，下次会努力温书。」 

如果有一日假期可以同妈咪一齐过，我会想同佢睇电影，因为几次睇电影妈咪都无一齐，只有家姐、爸爸。虽然妈咪平日要返工，陪我嘅时间唔多，但佢都坚持每日送我返学。另外，妈咪收工后会督促我快啲温书，但我有时都系敷衍咁答「知道啦！」，最后出到嚟得40几分，唔合格，搞到佢好嬲。除咗唔温书、考试低分，妈咪好少闹我，所以我都想同佢道歉，承诺下次会努力温书。

小四陈慧嘉：「放假玩夜啲都唔怕啦！」 

我会形容妈咪系狮子同兔仔嘅混合体。喺我唔小心撞到或者整到人嘅时候，佢会帮我同人道歉，就好似狮子咁勇敢；但有时又会好似兔仔咁温柔，例如我玩得太耐游戏，佢会温柔咁提醒：「休息下，唔好玩咁耐，只眼会好攰。」好有耐心劝我。有时放假玩到12点几，佢都会忍唔住话：「好夜啦，要瞓啦，唔系听日又瞓到好晏先起身。」通常𠮶阵我心入面就会谂「既然放假，都想玩耐啲」，不过呢个时候其实都眼瞓，所以都会听妈咪话，先瞓觉，第二日再玩。

小四何楸恩：「畀多少少时间同耐性听我讲嘢。」

最想同妈咪讲「我好爱佢」，平时唔会讲因为觉得佢唔会听，怕佢觉得我烦，阻住佢做嘢。佢好忙，收工返到屋企已经差唔多八点半，所以无乜时间陪我。最记得细个佢带过我去海南岛嘅三亚旅行，𠮶次好难得佢完全放低工作，全心全意咁陪咗我成个礼拜，我哋做咗好多嘢，食嘢、玩沙、执贝壳。我知道有时佢恶、闹我都系为咗我好，就好似原本识嘅题目因为自己粗心大意而做错，其实都系想我下次唔好再犯，不过如果可以多啲耐性就好啦！

小二横村天祐：「钟意你，多谢你嘅爱护。」 

同其他同学仔唔一样，我系中日混血儿，妈咪系香港人，爹哋系日本人。平时喺屋企同妈咪用广东话，同爹哋就用日文沟通，我嘅广东话或者有时中文功课唔识都系妈咪教我。妈咪通常送完我返学就返工，返四个钟，12点半收工，再接我放学，好频扑，所以都想同佢讲「钟意妈咪，多谢你嘅爱护」。或者因为我系男仔，之前一直都唔好意思当面讲，嚟紧母亲节可能会写张卡畀佢表达自己嘅心意。

小一乔祉允：「想去海洋公园玩。」 

唔敢同妈咪讲系因为有时佢会话「no」，同埋估到佢会拒绝。虽然想去海洋公园玩，但我已经唔敢问妈咪可唔可以去同点解唔可以去。记得旧年去海洋公园可以睇到熊猫，佢哋真系好可爱、好搞笑。仲有水母、鲨鱼，我最惊鲨鱼，好彩有啲玻璃隔住。

小一Ferraris Tiana Marie：「买一只高过我嘅大狗。」 

Tiana呢个名系妈咪揾佢老师帮我改嘅，妈咪系菲律宾人，所以我无中文名。我都系最想同妈咪去海洋公园睇熊猫，因为之前去过两次都睇唔到；仲想养一只好大嘅狗，高过我，喺YouTube见过。虽然妈咪同我都好钟意动物，但我知道佢揾钱好难，又要照顾我同哥哥，屋企仲有两只猫，所以无同佢讲。其实妈咪好好，虽然佢能力有限，但都会尽量满足我。

文：林诗敏

图：PhotoAC、林诗敏、部分由受访者提供

相关文章︳小朋友话你知农历新年最想做的是…「过年唔好讲读书」、孝顺仔想「帮嫲嫲买肠粉」︳亲子热话

相关文章︳小朋友最想要的圣诞礼物是…想跟哈利波特一起冒险？去澳洲过夏日圣诞︳亲子热话