KellyChu - 4年不斷贏累計90獎項 11歲花式跳繩新星陸鏗善膺亞洲賽總冠軍 | Executive日記

更新時間：02:00 2026-08-26 HKT
發佈時間：02:00 2026-08-26 HKT

講起跳繩，大家可能剩係諗到熱身運動，但原來加入音樂同花式技巧後，可以變成考驗手眼心協調嘅「魔力運動」。啱啱落幕嘅2026亞洲跳繩錦標賽，香港代表隊就喺3個年齡組別奪得84面獎牌（包括19面金牌）。年僅11嘅陸鏗善勇奪個人9至11歲全能總成績冠軍，仲獲得團體項目全能總成績冠軍，以及交互繩四人花式亞軍等獎項，一躍成為花式跳繩界嘅亞洲新星。

　　呢位隸屬香港花式跳繩會嘅小將，接觸花式跳繩其實只有4年，但已贏得超過90個獎項。佢同跳繩結緣，始於新冠疫情停課期間，當時父母希望佢可以喺屋企做少少運動消磨時間，點知佢展現出過人天分。復常之後，佢喺學校嘅花式跳繩課程被世界冠軍級教練周永樂發掘，獲挑選加入香港花式跳繩總會並接受系統訓練。

　　面對密集式訓練同比賽壓力，陸鏗善有自己嘅一套「零壓力哲學」。佢話：「花式跳繩帶畀我好多快樂，就算唔開心，跳繩都會將啲唔開心跳走。輸贏唔緊要，我好享受每次練習同比賽。」講到榮譽，佢更重視同隊友一齊奮鬥嘅時光：「得獎係好開心，但比起個人獎項，其實我更想同隊友們一齊攞團體獎，因為我哋一齊努力操練，互相見證大家嘅付出。」

　　陸鏗善就讀嘅博愛醫院歷屆總理聯誼會鄭任安夫人千禧小學，一向秉持「讓學生享受童年」嘅理念，鼓勵學生喺不同領域建立自信。佢爸爸分享，喺密集操練下，兒子學業成績依然名列前茅，剛過去嘅學期考獲全班第八名、全級第二十名，證明運動同學業係可以相輔相成。

　　暑假後將升讀小六嘅陸鏗善，已經放眼明年世界賽，繼續以佢招牌嘅「零壓」哲學應戰。佢笑言：「有冇獎項都唔緊要，可以同隊友們一齊練習同挑戰，已經好開心喇。」

KellyChu