KellyChu - 4年不断赢累计90奖项 11岁花式跳绳新星陆铿善膺亚洲赛总冠军 | Executive日记

更新时间：02:00 2026-08-26 HKT
发布时间：02:00 2026-08-26 HKT

讲起跳绳，大家可能剩系谂到热身运动，但原来加入音乐同花式技巧后，可以变成考验手眼心协调嘅「魔力运动」。啱啱落幕嘅2026亚洲跳绳锦标赛，香港代表队就喺3个年龄组别夺得84面奖牌（包括19面金牌）。年仅11嘅陆铿善勇夺个人9至11岁全能总成绩冠军，仲获得团体项目全能总成绩冠军，以及交互绳四人花式亚军等奖项，一跃成为花式跳绳界嘅亚洲新星。

　　呢位隶属香港花式跳绳会嘅小将，接触花式跳绳其实只有4年，但已赢得超过90个奖项。佢同跳绳结缘，始于新冠疫情停课期间，当时父母希望佢可以喺屋企做少少运动消磨时间，点知佢展现出过人天分。复常之后，佢喺学校嘅花式跳绳课程被世界冠军级教练周永乐发掘，获挑选加入香港花式跳绳总会并接受系统训练。

　　面对密集式训练同比赛压力，陆铿善有自己嘅一套「零压力哲学」。佢话：「花式跳绳带畀我好多快乐，就算唔开心，跳绳都会将啲唔开心跳走。输赢唔紧要，我好享受每次练习同比赛。」讲到荣誉，佢更重视同队友一齐奋斗嘅时光：「得奖系好开心，但比起个人奖项，其实我更想同队友们一齐攞团体奖，因为我哋一齐努力操练，互相见证大家嘅付出。」

　　陆铿善就读嘅博爱医院历届总理联谊会郑任安夫人千禧小学，一向秉持「让学生享受童年」嘅理念，鼓励学生喺不同领域建立自信。佢爸爸分享，喺密集操练下，儿子学业成绩依然名列前茅，刚过去嘅学期考获全班第八名、全级第二十名，证明运动同学业系可以相辅相成。

　　暑假后将升读小六嘅陆铿善，已经放眼明年世界赛，继续以佢招牌嘅「零压」哲学应战。佢笑言：「有冇奖项都唔紧要，可以同队友们一齐练习同挑战，已经好开心喇。」

KellyChu