KellyChu - 素凱泰酒店名廚飛來港四手聯乘宴創新演繹菜式「泰」好味 | Executive日記

更新時間：02:00 2026-08-18 HKT
發佈時間：02:00 2026-08-18 HKT

港人愛吃泰國菜，Kelly成日直飛泰國嘆地道美食，但最近冇搭飛機，搭程船半個鐘就體驗到一場令人難忘嘅泰粵美饌盛宴。皆因曼谷素凱泰酒店Celadon餐廳泰國主廚Chef Jib專程飛來香港，與愉景灣著名食府「牡丹軒」中菜廳行政總廚林賢澤聯手炮製四手晚宴。佢哋以中泰美食精髓精心設計每道菜式，並配以優質美酒宴客，盡顯其創意、匠心與精湛廚藝。時隔數天執筆回味，小妹仍忍不住要說句：實在「泰」好味喇。

　　這場「四手聯乘·泰粵風華」盛宴上周五在牡丹軒舉行，頗有大家姐風範嘅Chef Jib一出場，三言兩語便炒熱現場氣氛，雖然個性爽朗豪邁，但她一雙巧手能把蔬果雕出龍鳳，尋常芥蘭像藤蔓一樣纏在牛扒之下，令小妹眼前彷彿瞬間置身東南亞。

　　兩位主廚將泰式咖哩融合慢煮三文魚，既保留泰菜濃郁風味，亦凸顯中菜多樣化烹調特色。咖哩香料氣味吸引，三文魚入口即化，味蕾衝擊又享受，再呷一口層次豐富嘅Duckhorn Vineyards Napa Valley Merlot 2022，回味更是悠長。

　　Kelly平日最愛咕嚕肉，澤師傅運用巧思將酸甜兩種味道分開，喺扎實嘅黑豚肉外層裹上山楂汁，面頭放上一舊拔絲，兩者意想不到碰撞出另類咕嚕肉風味，配以果味香濃、飽滿圓潤嘅Calera Central Coast Chardonnay 2023，中和解膩，美味level up。

　　澤師傅喺香港擁有豐富傳統粵菜與高級餐飲經驗，既敢於創新又深諳傳統精髓，今年12月更將與7位主廚16手聯乘，在愉景灣打造2026年壓軸大型廚藝盛宴，機會難遇。據悉早鳥預訂現已開放，各位美食家記得把握優惠報名喇。

KellyChu