KellyChu - 唐述嘗申滙聯乘兩名廚四手獻技粵滬美饌綻新味 | Executive日記

更新時間：02:00 2026-08-14 HKT
發佈時間：02:00 2026-08-14 HKT

做生意幾時都要有新意先至能夠滿足好似Kelly咁貪新鮮嘅顧客。最近讓城中饕客豎起手指公嘅一場四手晚宴，由兩位米芝蓮星級主廚——唐述廚藝總監周世轁與嘗申滙行政總廚陳天龍合作，匠心打造9道融合粵菜傳統、滬菜風華嘅創意菜式，將雙城味道昇華呈現。其中一道「鱔糊脆皮雞翼」匯聚香港巧手與上海滋味，心思之作，凸顯中菜無限可能。

　　四手晚宴菜單上有：燻椒麻鳳尾魚·翠玉烏魚子·鍋巴鹿兒島和牛、川貝琵琶燕窩燉雪梨杏汁湯、雙廚弄蝦、乾燒汁脆皮花膠、楊枝甘露雪葩、遠年陳皮東坡肉（可另加私房溏心乾鮑魚）、鱔糊脆皮雞翼、蟹黃津白炆年糕，以及甜點蓮子紅豆砵仔糕·雷沙高力·桂花酒釀丸子。

　　前菜中嘅鍋巴鹿兒島和牛，融合唐述招牌菜炭燒鹿兒島A5和牛叉燒，鍋巴以蓮藕為餡沾蜂蜜加上脆米在面而成，叉燒香氣誘人入口即融，伴隨脆而不硬並甜甜地嘅清爽鍋巴，口感、味道層次豐富。周世轁師傅介紹第二道杏汁湯，除南北杏亦用上美國杏仁，加以烘焗，湯頭濃郁清香。還有滿滿燕窩，啱晒女士養顏。

　　作為上海本幫菜代表嘅鱔糊釀入港人最愛雞翼，是為晚宴最意想不到嘅驚喜配搭，一啖得嘗雙城滋味，更讚歎兩位主廚手藝精彩。東坡肉美味而不膩口，平時不吃肥肉嘅Kelly都想Encore。原來年僅三十多歲嘅陳天龍師傅已有17年入廚經驗，以新派手法演繹出滬菜傳統，殊不簡單。

KellyChu