KellyChu - 願望成真基金協助往海洋公園任一天護理員少年戰勝癌魔親親貓頭鷹圓夢 | Executive日記

更新時間：02:00 2026-07-31 HKT
發佈時間：02:00 2026-07-31 HKT

唔同嘅小動物都有佢哋可愛及特別之處，18歲嘅柏悅就鍾情貓頭鷹，佢話因為貓頭鷹既可愛又兇狠，呢種反差萌好有魅力。誰曾想到Kelly面前呢位健談開朗嘅男孩，曾與癌症對抗，經歷咗一段漫長治療才重拾健康。昨日喺願望成真基金及海洋公園帶領下，佢得以實現一個獨特願望——擔任一日鳥舍管理員及動物護理員，近距離接觸最喜歡嘅貓頭鷹，亦與父母一起跟海獅互動，留下珍貴回憶。

海洋公園鳥舍動物護理員帶着2公斤重嘅雕鴞（又叫大貓頭鷹）出場講解其特質及習性。柏悅在旁細心聆聽，不時向護理員提問，十分雀躍，最後更拿起手機自拍留念。問及柏悅幾時接觸並喜歡上鳥類，佢表示，大概12歲升讀中學嗰年比較有壓力，喺返學途中見到雀仔，於是開始觀察牠們，並產生興趣。佢話鳥類與其他動物不同之處，係可以畀到自己一種平靜嘅感覺。

柏悅兩年前在一次學童健康檢查發現胸前有陰影，經進一步診斷，確診第三期瀰漫性大B細胞淋巴瘤，最後在兒童醫院展開治療。佢憶述，治療期間最難受係藥物帶給佢嘅副作用，身體需要承受痛楚，雖然現在已經康復，但感覺身體不如以前，例如行兩步樓梯都會喘氣。雖然康復路上難關重重，但柏悅仍以堅毅意志參加DSE考試，成功升讀大專。佢話好多謝父母喺治療期間一直陪伴，給予佢無限嘅愛，醫院嘅護士亦常常送上貼心關懷。

柏悅感激願望成真基金嘅悉心安排，讓佢可以近距離接觸心儀嘅動物，並從中學習護理知識。最後，佢寄語像他一樣於青少年時期患病嘅孩子，無論面對治療或是康復後嘅人生，都不要喪失對生活嘅動力，「生病嘅時候可能大家都會話你好叻，但回歸正常生活後會發現其實自己同其他人都係一樣，要預先有心理準備去接受這個落差。」

KellyChu