學生哥呻爆讀書慘過返工竟釣出神級港媽亂入留16字金句勸世惹熱議｜Juicy叮

更新時間：16:00 2026-11-12 HKT
發佈時間：16:00 2026-11-12 HKT

一位學生哥在網上發文申訴讀書壓力大，意外引發極大迴響，這名學生樓主發帖大呻：「有冇人明學生有幾辛苦？朝早六點幾要起身，雖然三點幾四點放學，但你放學之後又要做功課又有補習有時仲要有課外活動重遲啲先返到屋企。」他更直言大人返工好歹返屋企可以休息，但學生「返屋企又要溫書溫度十點幾十一點幾先瞓，每隔幾個禮拜又quiz又test再唔係就考試，咁真係......」

「連休息少少都有罪惡感」

這番「學生辛酸淚」一出，引來逾四百名網民瘋狂留言，瞬間演變成各方論戰。不少「同路人」或剛剛畢業的過來人，對樓主的處境深表同情，有同為學生的網民感嘆：「最攰唔係日日返學，係你好似永遠都有下一樣嘢等緊你。做完功課有補習，補完習要溫書，考完試又準備下一個Quiz。連休息耐少少，都會有罪惡感。」

有已畢業多年的打工仔，更回首過去依然覺得讀書才是人生陰影，一位打工仔坦言：「完全明做學生個種辛苦，我做咗社畜四五年都仲係覺得返學係惡夢，我放假就真係放假，但學生放假仲要做功課溫書補習，到依家都唔明點解啲人話返工辛苦過返學。」另一位網民更指出兩者最大分別：「返學無錢收返工有錢收，一個二個Ｘ樣個個都話返工攰過返學，不如你出糧俾我返學我一定日日返！」

打工仔：「社會很殘酷，歡迎來到惡夢開始」

不過，其他「打工仔」網民卻對學生的抱怨顯然不買賬，紛紛開啟「大人模式」進行無情鞭撻，警告學生「好戲在後頭」：「等你出嚟社會先發現真正惡夢既開始，盡頭係你死左先會到達。」

有網民亦列出成人世界的各項開銷，向樓主高呼：「哇咁辛苦啊，咁快啲出嚟投身社會做個自由快樂嘅成年人喇，交稅交租交電話費網費水費煤氣費保費......自己煮可以買埋餸，有買樓又可以自己供......不知爽過做學生幾多，社會見。」

另有打工仔直指，返工的壓力是涉及生存問題：「返學唔會俾人投訴到無書讀，返工可以俾人投訴到無工開。」、「返工何嘗唔辛苦？到你出嚟做野每日對住啲Ｘ街老細，成日OT又要做埋啲濕膠project，再加埋要養家各項經濟負擔，再作個比較吧。」

「每日loop，遺憾終身」家長網民亂入 16字金句最吸睛

在這場「返工 vs 讀書」的爭論中，最矚目的莫過於其後加入的「家長組」網民，一眾為人父母的網民表示，無論是讀書還是返工，在「父母」這個24/7的終極角色面前，通通只是小兒科。

一位媽媽網民分享了她猶如特種部隊的瘋狂日程：「我做老母，5：45起身準備早餐，6點幾剷細路起身，食早餐送返學，8：30返到公司，6：00收工，又返去整頓細路，仲有煮飯做家務，啲哂細路10點訓，仲洗緊衫，執緊野，坐一陣，11、12點先訓，每日loop。」她更幽默地留下一句16字驚世警言勸世：「單身一世，幸福一身，一時之快，遺憾終身呀。」

另一位媽媽也附和道：「我做老母仲辛苦！要早過我仔起身......夜晚又煮飯，之後hea到一個鐘，再催佢10點左右要瞓！每日我只瞓5-6個鐘！全部家務係我做！日抖無瞓架！」有網民更直接改編樓主的帖文，反諷道：「有冇人明做父母有幾辛苦......成日喺屋企唔出得街free......每隔幾個禮拜又家家長會又睇功課再唔係就見老師，真係生舊叉燒好過生仔......」