抽中粉嶺新公屋嫌遠 網民獻計寫信去「呢個邨」 樓主嬲爆：點解講啲有骨嘅嘢？｜Juicy叮
發佈時間：16:00 2026-11-10 HKT
一名申請新界區1人單位的網民獲派粉嶺全新公屋「鳳凰嶺邨」鳳耀樓，卻因為工作與生活圈子在荃灣而陷入天人交戰，帖文一出隨即演變成大型網民辯論現場，由交通攻略、新界等樓幻想，一路吵到「象山邨風水學霸論」，金句百出。
獲派全新公屋「鳳凰嶺邨」掀優劣討論
該名樓主在facebook群組發文求助，短短一句「唔知要唔要好, 鳳凰嶺邨, 返荃灣應該好遠」，瞬間點燃一眾街坊與公屋申請者的討論熱情。有熱心網民立即化身「交通部部長」，指鳳凰嶺邨鄰近聯和墟，「都不錯，近聯和墟」，更有網民提供實測數據力勸樓主接受，表示「有架278A 皇后山開出 鳳凰嶺村就係聯和墟巴士站上車去到如心廣場巴士總站，車程大約53分鐘」，亦有人補充「10分鐘內行到去聯和墟總站，搭278A，但留意時間表。全程50幾分鐘」，或者出粉嶺轉乘278X直達荃灣，直言「係遠D，但好新，針冇兩頭利」、「好靚，鳳凰嶺，好方便，唔要就係你穩笨」。不過亦有準住戶爆出新樓的小缺點，笑言「我都係鳳凰嶺邨330呎，但係室內牆超厚冇咗30尺」。
既然嫌粉嶺遠，有網民就獻計叫樓主放棄今次機會「等錦河」，指位於元朗錦田南、港鐵錦上路站旁的錦河邨預計2027年3月落成，樓高僅16至17層，共提供約2,788個單位，當中亦有約150平方呎的1至2人單位，更賣花讚花香地表示「一個站就元朗去荃灣兩個站，落西鐵幾分鐘，樓不是很高10幾層，冇咁密集 空氣好」。樓主聽後亦一度心動，探問「得10幾層高？是否好少單位」、「一人單位會有嗎？」，更坦言「其實我都好想」，甚至覺得就算二派去古洞，「古洞近地鐵, 反而唔怕」。
不過，這番美好幻想隨即被一眾清醒網民淋冷水，有網民直斥「你話等就等？我住元朗都冇得等錦上路......」，有網民亦警告錦田一帶「唔好既咪隔幾日就有直升機嘈音，一嘈就成晚，重有動物排泄物臭味」，而且「屯馬綫錦上路站早上好難上車」、「上一站元朗已經上唔到咁滯」。
網民：「試下寫信要求象山」 「象山根本唔係大家講到咁差」
正當大家認真討論新界北交通之際，一名網民突然拋出震撼彈，留言建議樓主「試下寫信要求象山」，結果瞬間引爆全場火藥味！樓主當場動氣反問「點解要講d有骨的說話呢？」，更與其他網民一唱一和指「冇錯，都係荃灣，大家都知象山係點樣，相信佢自己都唔想要」。
該名提出建議的網民大感委屈，連環留言反擊指「見你鍾意荃灣，先咁樣建議你，又話有骨，呢道好多人唔鍾意象山，先建議你試下人棄我取，其實象山根本唔係大家講到咁差，行過少少到可風門口已經好多車搭」，更表示「對樓主好失望，好心建議下就覺得我想陰你，我以前都有同學住象山，讀書仲好叻」、「以前都有同學住象山，風水幾好，佢都係學霸」。
這番「象山學霸風水論」引來旁觀網民食花生，有網民直指「嘩你呢句急到呢。我唔否認你呢一句嘢嘅可行性，但係對大多數人而言過於刺耳」，亦有網民笑回「風水呢啲嘢一個單位一個講法，你同學條命好好」，並點出關鍵「至於樓上話寫象山，係好pk但係至少落荃灣方便。一定好過鳳凰嶺」。
除了象山邨之爭，留言區更出現不少突破盲點的質疑，大批網民奇怪樓主既然心繫荃灣，為何當初不排「擴展市區」而要排「新界隊」，紛紛留言嘲諷「但你派鳳凰嶼係新界隊又唔轉去擴市咁搞笑」、「揀得新界區預咗啦！」、「我想講荃灣係另一條隊（擴展市區） 鳳凰嶺係（新界）」。
期間更有網民胡亂獻計叫樓主搵區議員寫信去房屋署要求調去荃灣，隨即被其他網民群起糾正「唔好亂教啦，議員信無用架」。面對樓主既想要新界隊的快、又想要荃灣區的近，不少網民開啟「嘲諷技能」，曲線留言說「啱先要啦緊係，再派唔啱唔要，再再派再唔啱都唔要，派到喺公司隔離為止」、「唔好要，等派海之戀」、「要求禮賓府」，亦有網民指出「你咁問得證明唔係好想要啦，證明係無急切住屋需要，咁就等下啦」。
在一片唇槍舌劍之中，一名同樣獲派新界北的過來人留下一段極具警世意味的「勸世文」，為這場公屋風波寫下最貼地的總結：「樓主係返工荃灣，住新界區？本身住荃灣，自己揀新界區就冇計喎，同埋唔要，之後派乜比你冇人知，風險係你自己承擔，問人~答你個啲唔使負責任，住係你自己，我第一派中古洞，大把人話唔要，交通唔方便，我就乜都冇問人，選擇要，啲人話點解你唔博二三派，博佢老Ｘ，邊個知派啲乜比你，比個屯門三寶你就ＸＸ喇」。另一名網民亦爆金句勸解樓主面對現實：「香港地生活，有一好無兩好」。
來源：公屋討論區 - 香港facebook群組
延伸閱讀：北都區首批新公屋「鳳凰嶺邨」現拒絕個案 港爸抽中39樓高層靚盤竟狠心放棄 背後1理由惹熱議
