葵涌慈父黨：BB發燒差幾百蚊睇醫生 人妻遇騙失財$400 騙徒出一絕招呃埋手機號碼｜Juicy叮

「慈父黨」在葵涌出沒，當街攔截途人求助，揚言BB發燒差幾百蚊睇醫生，要求出錢幫忙。有好心人妻因為事件失財400大元，事發後已報警，並在網上講述事件詳情警世。

「慈父黨」行騙期間，還使出一絕招輕易取得對方手機號碼，試圖當面詐騙一次後，透過手機以各種藉口再騙一次。詳情見下圖及下文：

慈父黨：BB發燒差幾百蚊睇醫生  好心人妻遇騙失財$400 騙徒出一絕招呃埋手機號碼逐張睇↓↓↓↓

「慈父黨」要錢銀碼不斷加碼

樓主本月18日下午在社交平台Threads以「香港街頭騙案」為題，上載手機對話及電子報案截圖發帖，以長文講述事發經過——

「先講結論，係我蠢，俾人呃咗$400。
8月17日夜晚7:53咗右，我喺葵涌葵俊苑附近遇到一個男人攔我，話佢個仔發燒，要去診所睇醫生，但提款卡俾機吞咗，無現金。
一開始開口要$200，見我願意幫手之後改口話要$300，仲展示一張BB相，仲話自己係香港人，可以提供身份證明。
3分鐘之後再打電話嚟，話診所要$400，我再俾多$100。
去到夜晚22:20，佢再用WhatsApp打嚟，話個仔入咗醫院，要搭的士，再問我攞多$200。我叫佢搵第二個幫佢我無能為力。
成個過程前後矛盾：之前話用唔到網上銀行，點解後尾又叫我過錢？
最後我一共損失$400，已經報警。
想用自身經歷提醒大家：如果有人喺街度話小朋友發燒差幾百蚊睇醫生，請即刻拒絕，並建議佢打999。
香港急症室只收$180，就算無錢都唔會拒收，根本唔需要靠陌生人現金。
大家要小心！
好嬲， $400我請老公食燒肉唔好，我課金俾老公唔好。
總之我而家俾人呃咗，希望大家善良得嚟係有警覺。
如果大家睇到呢個案例，覺得唔想做好人嘅唔緊要，唔好害人就得啦。
如果你咁大愛都繼續想做好人，希望你做好人嘅時候亦都要提防騙子」。

從對話截圖可見，「慈父黨」留言「頭先感激」，約3分鐘後透過語音通話再聯絡事主。

相關閱讀：「還錢黨」講齊個人資料 無厘頭屋企樓下追債 醒目女教對付絕招：真係嚇到眼淚都出埋

街坊直指「慈父黨」是區內慣犯

看過「慈父黨」的故事，不少街坊網民心神領會，一口咬定是區內慣犯稱，直指「呢個係慣犯嚟，葵涌荃灣都會出現」。接著有街坊排隊分享遇騙經歷警世：

•葵涌呢個位我兩年前試過星期日上晝8點遇過，估唔到搵食搵咗咁多年。

•呢個騙子我都有撞到過！我同佢講你個細路喺邊度，我而家即刻帶佢搭的士一齊去，反正我而家得閒，之後佢走夾唔唞！

•點解行街俾人截住，我要停低聽佢講嘢，仲要跟手要拎錢出嚟幫佢？直行直過唔得嘅咩？驚人話你你無禮貌，定會打你？話俾大家知，正正就係葵涌區，好似係葵廣附近，就係有人聽呢啲騙徒講嘢，銀包拎錢出嚟嗰陣，就俾人搶。「君子不立危牆」。

•記得年幾前喺附近（興盛路遊樂場出面）都遇到類似嘅嘢，話個女做手術，喺醫院做手術，佢仲俾咗張身份證影，上面張相都對到嗰個人個樣，最後喺附近銀行即場撳$300。10分鐘之後佢打嚟同我講個女要轉去第二間醫院，要我俾多$500佢搭的士，咁當然就無睬佢啦，最後都報咗警，不過都無乜用。

•我都遇過同一個人！喺葵興KCC（活@KCC，商場）門口，話個女入咗屯門醫院唔夠錢坐的士。我話我無現金，佢話附近有銀行／Payme佢都可以。佢不停強調自己好急，唔係呃人，叫我影佢身份證。跟住我就無理佢走咗～

•呢個我都遇過，在葵興嗰頭。唔知樓主係咪都係遇到呢個？

•我都做過類似嘢，係葵芳地鐵站借咗$200俾人，已經唔記得點解會借，話第二日俾返我，但第二日同一時間我淨係遠遠睇到背影咋，可能搵下個人啩？

•呢個手法好耐了，嗰陣3-4年前都係葵芳附近，有個男人話個仔入咗某醫院，問我借錢搭的士，事關醫院係可以打去查詢病人喺邊個病房，所以我直接打去嗰間醫院問有無呢個病人，結果醫院無佢所講嘅病人名，收咗佢皮。

•上年都有類此情形，嗰條Ｘ樣係四眼古惑Ｘ，佢同我朋友講，話佢個女兩個月大，有話離婚，老婆走咗，問我個friend（朋友）借500元，呢條Ｘ樣七情上面，之後話出街唔記得帶鎖匙，不過好彩，最後睇電視俾人拉咗，因為劇本一模一樣，所以香港再無人做好心，太多呢啲人。

相關閱讀：「少女睡衣黨」屯門周街開價 問人攞$5做呢樣嘢...... 街坊爆3大出沒熱點

網民奇怪與陌生人交換電話

有網民奇怪對方何解會有樓主的手機號碼，於是查問「三唔識七交換電話？」、「但係，點解你會同個陌生人交換電話，仲WhatsApp？」。

樓主回應指「因為佢話聽日俾返我，叫我留個電話俾佢，而家點解釋都無用，總之就係Ｘ咗，如嗰識諗嘅話就乜嘢都唔會俾佢了」。網民於是關心「哎呀！Block（攔截）咗佢（電話號碼）未？」，樓主醒目地稱「Block咗啦，不過俾咗電話出去，可能呢排都有排煩」。

相關閱讀：西環變種「呃食黨」唔要錢改要ＸＸ 苦主矇查查破財：我係咪俾人呃咗啊？

網民分享其他遇騙經歷

除了「慈父黨」，網民也藉這帖文，分享其他遇上騙子的經歷一同警世：

•我都試過夜晚10點幾喺屯門，俾大陸人問中銀喺邊，之後又話自己張卡有問題，電子payment（支侍）全部唔得，問我借錢搭車出九龍，我叫佢去警署搵幫手，佢哋即刻話咁小事唔洗搵警察啦，笠水走～我心諗我個樣真係似好易呃？！

•我試過喺荃灣愉景新城停車場俾人呃咗一嚿水，我嗰陣時記得喺架𨋢度，條友話唔見咗銀包，又趕住去接個孫，無錢出停車場，之後叫我借一嚿水俾佢，嗰陣時諗住好心幫下人，點知佢俾個電話係假嘅，咁就俾人呃咗一嚿水，自此之後唔會信任何陌生人。

•我都試過類似經歷，不過係個大陸人好心急話無錢坐車去機場要趕飛機，佢好誠懇咁講問我有幾多現金，我無現金所以去咗7仔買嘢拎咗$200俾佢～佢問我拎wechat（微信）話過返俾我～不過我本身無用wechat，但照拎咗佢wechat acc（微信戶口）~成件事其實我係「試驗」心態佢係咪呃人，咁最後都不出所料真係消失咗～我到今日都係同自己講仍然要有智慧地保持善良，一個衰人唔代表全世界都衰。

•我都試過喺旺角，有個女人好趕急咁話要去機場，問咗我借$200定唔知$400，但係講緊嗰陣我只係一個學生。我都覺得自己蠢，點解會仲喺度check（檢查）住個戶口佢有無過返數俾我。但係過咗去啦，有陣時真係希望幫到人。

•我明，幾年前我喺黄埔地鐵站，有騙子先攞住10蚊話要唱散紙，跟住又話唔係唱係借$10，跟住又話唔夠再借多$7，總共$17。騙子就會利用呢啲心理，見你落搭，呃完又呃，$17當然好少錢，樓主嗰$400相信你都唔缺。呢件事唔關金額事，被騙徒欺騙，因為自己太善良，諗起都嬲嬲地。

相關閱讀：港男羅湖遭「美女黨」糾纏實拍全過程 請飲嘢後出事：「佢拉住我唔畀我走！」最後金錢損失咁多

網民感謝樓主警世讚善心

不少網民感謝樓主發文警世，大讚善心，並提醒「唔好俾呢個人嘅錯，去影響到你繼續做一個善良嘅人」。

•我都住附近，多謝通知。樓主是善心人，上天會補償你的。

•唔係想安慰你，只係400蚊學費好抵㗎啦，正常上一堂，受用一生喎。

•唔好咁怪自己，你係善心但俾人利用，老實講如果我喺徬徨之際有人願意幫助我，我都會好感激，亦感謝你出post（發帖）提醒騙徒新講法呃人。

•應該好多人會開口第一句話你，咩你咁蠢㗎？但我希望你要自己知道，我亦要突登咁同佢講返句，你係一個善良嘅人，量力而為去做善良嘅事嘅你，係無任何嘢做錯，唯一嘅錯只係呢個呃你嘅人，唔好俾呢個人嘅錯，去影響到你繼續做一個善良嘅人。

•我覺得第一時間想幫佢都好正常，不過可能遇到類似事件就問佢邊間診所，話直接同佢一齊去診所俾，睇下佢點回應。我都試過喺大欖隧道轉車站遇到個好似地盤佬嘅人話跌咗銀包問我「借」$100，俾咗佢又話想要多$100買飯俾個仔食，又叫我交換電話影低身份證之類。我最後都係話無呀，我得$100你唔夠都無計，唔想留電話俾佢。佢呃又好真又好，我當自己跌錢算。

另有網民肉緊教路：「其實近年都成日講好多騙子騙案，講到口臭，我唔明點解咁多人仲咁易俾人呃？你話係親人有事會慌張尚能理解，但呢啲三唔識七陌生人一講錢就知有問題啦，仲要俾佢呃兩次，仲要俾個陌生人繼續聯絡你，Ｘ，我講嘢難聽就唔繼續講，總之一句幫佢報警就得啦」。

資料來源：gessicary＠Threads

相關閱讀：美女黨？兩女九龍城撩司機搭順風車 3男藏身街角疑不軌 事主爆後續↓↓↓↓

美女黨出沒？有司機分享去年底在九龍城被兩名女子，兜搭要求坐順風車，其後在車cam片發現，有3名男子緊隨其後藏身街角，疑似有不軌企圖，引發網民熱議。事主在「車cam L（香港群組）」FB專頁分享這段「細思極恐」的經歷，與及後續發展如下↓↓↓↓