月入3萬港女擬一個人租樓住 公開2萬使費清單引議：一嗜好佔開支4成｜Juicy叮

一名快將30歲、月入3萬至4萬元，月花8000元養有兩隻狗狗的港女，因覺「每日搭車來回3粒鐘，嚴重浪費光陰」而有意一個人搬出來住（心水是近工作地點的葵青和荃灣區），於是列出約共2萬元的支出清單，請教網民「一個人搬出去住應該預鬆幾錢呢？」。

熱心的網民簡單了解過事主背景後，給出詳細而有用的建議。在經過與10位網民用心的一問一答後，心大心細的樓主知道了租樓的大概預算，也從中明白到一件原來比搬屋更重要的事情，醒覺到應該先行解決這樁大事，租樓的退堂鼓聲音漸漸由遠而近。詳情見下圖及下文：

月入3萬港女擬一個人租樓住 公開2萬使費清單引議逐張睇↓↓↓↓

樓主月花$8000養狗

樓主本月6日在社交平台Threads以發帖，發長文請教網民：「其實一個人搬出去住應該預鬆幾錢呢？或者留幾錢儲蓄先儲考慮？ 兩、三個月租？」。樓主表示「有Keep（保持）住睇租盤，但無啱心水，預$7000-$10000，想近地鐵紅線（荃灣線），有露台仔，可寵（物）」。

接著列出每月花約2萬元的日常支出清單：「平時三餐屋企煮／外賣，個人日常使費約$4000，食飯$3000，無車，交通費約$3000，狗狗使費約$6000-$8000。未買保險（得基本醫保）好似1年$2000-$3000」。

樓主坦言「扣扣埋埋都好似好抆水，份糧扣完應該夠交租+水電，到時可能隻狗就要節衣縮食。但唔搬，每日搭車來回3粒鐘，嚴重浪費光陰。你係我嘅話，會唔會搬？ps（補充）唔考慮合租」。

十位網民熱心答客問：

回應的網民都將心比心，細心分析後發文回應，而樓主在回應時也透露了自己的更多生活細節：

•網民一：留位想知1萬邊度有租盤有露台又近地鐵站，業主仲比養狗狗？
•樓主：細嘅開放式真係有，都唔少，但一係唐樓行樓梯，一係舊樓。旺角／深水埗，但寵物好講彩數。貓會好啲，兩隻狗超級難搵。

——————————

•網民二：荃灣／大窩口嗰頭啲村屋睇下得唔得囉。
•樓主：想呀！ 本身都想葵荃！近舖頭，但一係好舊，一係好貴。
•網民三：如果一個人住，可以試下搵啲做學生宿舍，租金會平啲。

—————————

•網民四：同男朋友住？
•樓主：暫時唔諗，要搬就搬一個人住，如果唔係同屋企住好啲。

——————————

•網民五：你唔計租都要用2萬，反正都用得多。咁梗係搬啦，慳啲時間都好。
•樓主：就係咁諗，心大心細，搬出去無人煮飯，驚開支大。

——————————

•網民六：不如講埋你搵幾錢。
•樓主：3萬—4萬左右啦，但其實搵幾多都一樣，最主要自己大使。聽完大家分析，無儲蓄係最難搞，所以要Solve this problem first（先解決這問題）。

——————————

•網民七：最少半年以上後備資金，兩三個月太少。如果同屋企人無問題，來回3個鐘我選擇自己住，做晒所有家務，水電、上網費、其他瑣碎嘅費用都要俾，預半年租金，二按（按金）一上（上期），覺得基本啦。

•樓主：無問題呀，媽媽會煮飯做家務，除咗車程太耐，住屋企其實好好多。咁多，真係要儲下先咁。

——————————

•網民八：視乎屋企有無空間，同屋企人關係如何。如果自己同屋企人關係都幾好，又有自己一間房，我寧願俾多少少家用都費事搬出去。如果真係好想搬出去都會自己供間樓仔，費事交租。

•樓主：其實除咗車程，基本上無大問題，家用都係隨心俾，無固定數～所以如果無儲蓄情況下，都係聽上面師兄講，儲下錢先再諗，haha（哈哈）。

網民八：車程可以善用，好多嘢其實可以克服到。

——————————

•網民九：來回3粒（鐘），即粒半單程可接受，返22日（工）Ｘ3h（小時），10000蚊除開$15x/h，租屋住條數高過你份工時薪，仲未計水電煤。

•樓主：係㗎，但搬咗出去，就方便好多，車錢會慳到$5000左右，所以呢個先掙扎位。

•網民九：買餸洗嘢煮飯洗碗洗衫拖地，咩都要自己落手，自己衡量多少少，不過自住係勁自由。

•樓主：之前都獨立住過一排嘅，分咗手所以返娘家住，但車程相差太遠，心思思先想再出去住。

•網民九：咁Ok啦，唔掂再返去，有後盾仲正。

——————————

•網民十：我個人計法，係預半年租金，即係萬一萬一有原因而突然無收入，6個月內仲未搵到工都仲交得起租。另外兩按一上再加佣金雜費，所以最少要預10-11個月嘅資金。

另外唔知你宜家幾多歲、有幾多儲蓄，見你Budget（預算）係$7000-$10000，即係都唔係大富大貴嗰種，平均計當你租$8500，1年租金就10萬，兩年一個合約就20萬了。唔知你除咗3小時交通之外，仲有無其他原因驅使你搬？如果係原生家庭Toxic（有毒），咁我會覺得呢10萬、20萬係值得，但如果只係交通問題，真係睇下你覺得值唔值。

如果你已經近30歲，又本身已經有穩健儲蓄可以足夠日後自己增值，就算抆水都博得過。（我以前係每日2小時交通+Toxic原生家庭，宜家已經倒咗60萬落租金）

•樓主：除咗搭車，其他都好好。奔三了（快將30歲），無儲蓄，收入都唔穩定。有諗過會唔會供層細，見有啲真係好平（要屋企幫）。定租好啲，可以彈性啲，驚綁死。

•網民十：無儲蓄就真係唔使諗，開始交租之後如果係抆抆緊，你以後就好難有大額嘅儲蓄。當人哋30歲儲到（假設）80萬，假假地做無風險嘅定期都叫做有3%滾存增長時，佢就算月光族，都仲有80萬可以用嚟增值。但你連可以放入定期嘅本金都太細，然後又每個月都無儲蓄……

奔三都唔細啦，自住之前不如儲咗錢先再諗嗰3小時交通。

關於買樓，有錢就當然買好過租。不過見你話屋企人幫，除非係佢哋買一層樓然後你當交租俾佢哋，否則睇你情況就唔使諗供樓……（其實你都應該過唔到壓（力）測（試））。租樓無錢都可以再搬平啲或者搬返娘家，供樓你基本上無得斷，咁就一世（當然供完就係你嘅，到時你應該50、60歲）。

•樓主：完全中，咁真係可以放棄，望到80萬呢個字都好遙遠。
唉，儲錢勁難，其實每個月都搵唔少，啲錢唔知使去咗邊……有學人用CW Money（理財應用程式）記數，但太多數亂到九彩，淨係Mark（記低）收入都用盡精力。信用卡又多，每個月找幾萬，但Cut（取消）卡唔現實，太常要用了，而且Cut後我無辦法再Apply（申請）到好嘅信用卡（依家人工太低）。

好似困咗入死局咁，有無咩職業係專教人儲錢㗎，i.e.（即是）保險會叫你買儲蓄保。可唔可以分享下應該喺邊度起頭好，謝謝你。

•網民十：其實記帳真係理財嘅第一步，你要知道啲錢點樣飛走咗，知道宜家用剩幾多，先可以決定Cut咩支出，否則你總是會覺得啲錢唔會用得完，無錯係用唔完嘅，但你都無儲到錢……搵個簡單啲嘅App，每次Pay（支付）完即入數，唔好等夜晚、等過幾日。

如果收入唔高又想儲錢，必須要Cut一啲大額嘅娛樂同消費，又唔係要Cut晒，不過要減少，定個限制比自己，例如原本一年去兩次旅行就Cut一次，例如平時幾個月睇一次演唱會就Cut到一年只睇最想睇嗰一次。我個人覺得Cut大額消費係慳錢最快嘅方法。

不過呢，有啲人自細大使慣、屋企本身有錢，叫佢食平少少都好似委屈咗佢、覺得人生無晒意義，咁就無得救了。其實都係睇下你有幾大決心。

我見有人係唔簽卡改用Cash（現金），然後會嚇親自己，從此量入為出。每件事都有藉口就永遠都做唔到了。啊，同埋見到狗狗支出$6000-$8000其實真係幾高下，唔係叫你唔養，不過養狗同養人一樣，平有平養，貴有貴養，睇下有無得降低囉。

資料來源：suet0619＠Threads

相關閱讀：$500萬買200呎單位 供樓供到80歲 單身中女因一淒涼理由置業 網民心酸↓↓↓↓

 一名單身中年女子近日被同事爆料，指於2021年摸頂以$500萬買入一間面積約200多呎的單位，貸款30年，供樓供到近80歲。對於這位中女的高齡上車，網民大多不甚理解，認為做法傻豬，但原來事主有著一個令人心酸的淒涼原因。詳情見下圖及下文↓↓↓↓