月入3万港女拟一个人租楼住 公开2万使费清单引议：一嗜好占开支4成｜Juicy叮

一名快将30岁、月入3万至4万元，月花8000元养有两只狗狗的港女，因觉「每日搭车来回3粒钟，严重浪费光阴」而有意一个人搬出来住（心水是近工作地点的葵青和荃湾区），于是列出约共2万元的支出清单，请教网民「一个人搬出去住应该预松几钱呢？」。

热心的网民简单了解过事主背景后，给出详细而有用的建议。在经过与10位网民用心的一问一答后，心大心细的楼主知道了租楼的大概预算，也从中明白到一件原来比搬屋更重要的事情，醒觉到应该先行解决这桩大事，租楼的退堂鼓声音渐渐由远而近。详情见下图及下文：

月入3万港女拟一个人租楼住 公开2万使费清单引议逐张睇↓↓↓↓

楼主月花$8000养狗

楼主本月6日在社交平台Threads以发帖，发长文请教网民：「其实一个人搬出去住应该预松几钱呢？或者留几钱储蓄先储考虑？ 两、三个月租？」。楼主表示「有Keep（保持）住睇租盘，但无啱心水，预$7000-$10000，想近地铁红线（荃湾线），有露台仔，可宠（物）」。

接著列出每月花约2万元的日常支出清单：「平时三餐屋企煮／外卖，个人日常使费约$4000，食饭$3000，无车，交通费约$3000，狗狗使费约$6000-$8000。未买保险（得基本医保）好似1年$2000-$3000」。

楼主坦言「扣扣埋埋都好似好抆水，份粮扣完应该够交租+水电，到时可能只狗就要节衣缩食。但唔搬，每日搭车来回3粒钟，严重浪费光阴。你系我嘅话，会唔会搬？ps（补充）唔考虑合租」。

十位网民热心答客问：

回应的网民都将心比心，细心分析后发文回应，而楼主在回应时也透露了自己的更多生活细节：

•网民一：留位想知1万边度有租盘有露台又近地铁站，业主仲比养狗狗？
•楼主：细嘅开放式真系有，都唔少，但一系唐楼行楼梯，一系旧楼。旺角／深水埗，但宠物好讲彩数。猫会好啲，两只狗超级难揾。

——————————

•网民二：荃湾／大窝口𠮶头啲村屋睇下得唔得啰。
•楼主：想呀！ 本身都想葵荃！近舖头，但一系好旧，一系好贵。
•网民三：如果一个人住，可以试下揾啲做学生宿舍，租金会平啲。

—————————

•网民四：同男朋友住？
•楼主：暂时唔谂，要搬就搬一个人住，如果唔系同屋企住好啲。

——————————

•网民五：你唔计租都要用2万，反正都用得多。咁梗系搬啦，悭啲时间都好。
•楼主：就系咁谂，心大心细，搬出去无人煮饭，惊开支大。

——————————

•网民六：不如讲埋你揾几钱。
•楼主：3万—4万左右啦，但其实揾几多都一样，最主要自己大使。听完大家分析，无储蓄系最难搞，所以要Solve this problem first（先解决这问题）。

——————————

•网民七：最少半年以上后备资金，两三个月太少。如果同屋企人无问题，来回3个钟我选择自己住，做晒所有家务，水电、上网费、其他琐碎嘅费用都要俾，预半年租金，二按（按金）一上（上期），觉得基本啦。

•楼主：无问题呀，妈妈会煮饭做家务，除咗车程太耐，住屋企其实好好多。咁多，真系要储下先咁。

——————————

•网民八：视乎屋企有无空间，同屋企人关系如何。如果自己同屋企人关系都几好，又有自己一间房，我宁愿俾多少少家用都费事搬出去。如果真系好想搬出去都会自己供间楼仔，费事交租。

•楼主：其实除咗车程，基本上无大问题，家用都系随心俾，无固定数～所以如果无储蓄情况下，都系听上面师兄讲，储下钱先再谂，haha（哈哈）。

网民八：车程可以善用，好多嘢其实可以克服到。

——————————

•网民九：来回3粒（钟），即粒半单程可接受，返22日（工）Ｘ3h（小时），10000蚊除开$15x/h，租屋住条数高过你份工时薪，仲未计水电煤。

•楼主：系㗎，但搬咗出去，就方便好多，车钱会悭到$5000左右，所以呢个先挣扎位。

•网民九：买餸洗嘢煮饭洗碗洗衫拖地，咩都要自己落手，自己衡量多少少，不过自住系劲自由。

•楼主：之前都独立住过一排嘅，分咗手所以返娘家住，但车程相差太远，心思思先想再出去住。

•网民九：咁Ok啦，唔掂再返去，有后盾仲正。

——————————

•网民十：我个人计法，系预半年租金，即系万一万一有原因而突然无收入，6个月内仲未揾到工都仲交得起租。另外两按一上再加佣金杂费，所以最少要预10-11个月嘅资金。

另外唔知你宜家几多岁、有几多储蓄，见你Budget（预算）系$7000-$10000，即系都唔系大富大贵𠮶种，平均计当你租$8500，1年租金就10万，两年一个合约就20万了。唔知你除咗3小时交通之外，仲有无其他原因驱使你搬？如果系原生家庭Toxic（有毒），咁我会觉得呢10万、20万系值得，但如果只系交通问题，真系睇下你觉得值唔值。

如果你已经近30岁，又本身已经有稳健储蓄可以足够日后自己增值，就算抆水都博得过。（我以前系每日2小时交通+Toxic原生家庭，宜家已经倒咗60万落租金）

•楼主：除咗搭车，其他都好好。奔三了（快将30岁），无储蓄，收入都唔稳定。有谂过会唔会供层细，见有啲真系好平（要屋企帮）。定租好啲，可以弹性啲，惊绑死。

•网民十：无储蓄就真系唔使谂，开始交租之后如果系抆抆紧，你以后就好难有大额嘅储蓄。当人哋30岁储到（假设）80万，假假地做无风险嘅定期都叫做有3%滚存增长时，佢就算月光族，都仲有80万可以用嚟增值。但你连可以放入定期嘅本金都太细，然后又每个月都无储蓄……

奔三都唔细啦，自住之前不如储咗钱先再谂𠮶3小时交通。

关于买楼，有钱就当然买好过租。不过见你话屋企人帮，除非系佢哋买一层楼然后你当交租俾佢哋，否则睇你情况就唔使谂供楼……（其实你都应该过唔到压（力）测（试））。租楼无钱都可以再搬平啲或者搬返娘家，供楼你基本上无得断，咁就一世（当然供完就系你嘅，到时你应该50、60岁）。

•楼主：完全中，咁真系可以放弃，望到80万呢个字都好遥远。
唉，储钱劲难，其实每个月都揾唔少，啲钱唔知使去咗边……有学人用CW Money（理财应用程式）记数，但太多数乱到九彩，净系Mark（记低）收入都用尽精力。信用卡又多，每个月找几万，但Cut（取消）卡唔现实，太常要用了，而且Cut后我无办法再Apply（申请）到好嘅信用卡（依家人工太低）。

好似困咗入死局咁，有无咩职业系专教人储钱㗎，i.e.（即是）保险会叫你买储蓄保。可唔可以分享下应该喺边度起头好，谢谢你。

•网民十：其实记帐真系理财嘅第一步，你要知道啲钱点样飞走咗，知道宜家用剩几多，先可以决定Cut咩支出，否则你总是会觉得啲钱唔会用得完，无错系用唔完嘅，但你都无储到钱……揾个简单啲嘅App，每次Pay（支付）完即入数，唔好等夜晚、等过几日。

如果收入唔高又想储钱，必须要Cut一啲大额嘅娱乐同消费，又唔系要Cut晒，不过要减少，定个限制比自己，例如原本一年去两次旅行就Cut一次，例如平时几个月睇一次演唱会就Cut到一年只睇最想睇𠮶一次。我个人觉得Cut大额消费系悭钱最快嘅方法。

不过呢，有啲人自细大使惯、屋企本身有钱，叫佢食平少少都好似委屈咗佢、觉得人生无晒意义，咁就无得救了。其实都系睇下你有几大决心。

我见有人系唔签卡改用Cash（现金），然后会吓亲自己，从此量入为出。每件事都有借口就永远都做唔到了。啊，同埋见到狗狗支出$6000-$8000其实真系几高下，唔系叫你唔养，不过养狗同养人一样，平有平养，贵有贵养，睇下有无得降低啰。

资料来源：suet0619＠Threads

相关阅读：$500万买200呎单位 供楼供到80岁 单身中女因一凄凉理由置业 网民心酸↓↓↓↓

 一名单身中年女子近日被同事爆料，指于2021年摸顶以$500万买入一间面积约200多呎的单位，贷款30年，供楼供到近80岁。对于这位中女的高龄上车，网民大多不甚理解，认为做法傻猪，但原来事主有著一个令人心酸的凄凉原因。详情见下图及下文↓↓↓↓