月入2萬元中年漢當新手「窮爸爸」 網民力撐窮有窮養：我公屋長大回憶溫馨｜Juicy叮

有中年網民日前在網上報喜，指太太懷有身孕，自己當上了月入2萬元的「窮爸爸」。不少網民都對這位「窮爸爸」送上無限鼓勵和祝福，勵志地力撐「窮有窮養」，強調「我公屋長大回憶溫馨」。不過也有網民潑冷水，坦言「2萬真係好難搞喎師兄」。詳情見下圖及下文：

月入2萬元中年漢當新手「窮爸爸」逐張睇↓↓↓↓

童年窮得開心

樓主本月27日在社交平台Threads發帖，自爆「噚日醫生證實咗，我老婆有咗BB，從此我就係月入2萬蚊嘅窮爸爸。以前一直唔肯生仔，因為自己貧窮帶來下一代不幸，但最近係Thread見好多人話自己童年窮得開心。令我明白到，小朋友無論住公屋，定係住山頂，一樣咁幸福」。

不少回應的網民落力鼓勵樓主，指「2萬唔算窮啦」、「兩萬都唔算好差，咪公一份婆一份囉」、「2萬，唔窮了。10年前得萬三四蚊，都做咗爸爸。好彩依家有3萬蚊」。

有網民自爆「同你差唔多收入，我買咗樓，窮有窮養，加油呀」、「Ok啦，我爺嗰陣月入1萬都生咗我老豆」、「窮都可以生活得好，祝BB愉快成長，我爸爸都係養3個」。

有人更預言「話唔定小朋友出生之後成家都發奮，努力加油做個好爸爸媽媽！」；況且育兒「最重要係陪伴，小朋友最需要係呢樣，玩咩都唔重要」、「窮有窮養、富有富養，重點係有沒有陪伴孩子成長」、「幸福係大家都健康，一齊努力，一齊成長」、「父母的愛都好重要，錢係換唔到嘅」。

網民潑冷水：世界唔同咗

不過也有網民排隊潑冷水，指樓主「自己呃自己」、「2萬真係好難搞喎師兄」、「自我安慰及欺騙狀態中，祝你好運」、「現實係殘酷嘅......唔可以否認教育資源......醫療支援、生活環境對一個小朋友成長有幾重要」、「窮得好開心係以前無上網無ipad（平板電腦） iphone（智能手機）嘅年代，以前無得物質，宜家少啲物質都唔得」。

有人更加提醒「窮得開心係當年大家都咁窮呀」、「世界唔同咗啦，社會同時代都唔同咗。我哋以前係好開心，但係而家個社會環境咩都唔同晒！ 冇比較冇傷害」。

撐樓主網民：開心係感覺唔係物質

不過，還是有更多網民繼續力撐，安慰樓主——

•恭喜你！覺得唔需要將佢哋嘅留言放喺心，首先你先係你小朋友嘅爸爸，最緊要係你自己同你老婆嘅心態係點樣。窮有窮養，富有富養，但小朋友心靈上嘅滿足都唔係全部depends on（取決於）錢，加油；

•年代唔同咗，今時今日窮真係好大鑊㗎，不過都唔代表所有嘅，不過其他地方要做得夠，俾小朋友有健康童年真係好重要；

•個天安排咗小朋友帶齊行李嚟搵你，計劃一下點樣俾更好嘅生活佢，然後開心迎接，唔好理太多閒言閒語；

•開心係你俾佢嘅感覺唔係物質，只要好多愛，小朋友一樣開心，最重要係你有幾多愛俾佢；

•其實我覺得窮養冇問題， 不過記得要為自己退休著想。第日唔使仔女養就係最大嘅禮物； 

•咁講啦，窮真係無問題，但係要花多啲時間同小朋友相處，陪伴佢成長，令佢快樂；

•我覺得俾關懷同愛，多啲鼓勵少啲批評，即使冇錢，都可以創造平淡幸福嘅回憶；

•唔好聽啲負面說話，嘅然上天安排咗就開心迎接，有愛嘅家庭小朋友就會幸福。

網民有感而發講育兒觀

不少網民因而有感而發，發長文講述自己的育兒觀點與價值觀，更有人現身說法，講明自己住公屋長大，穿二手校服，但都係一段好溫馨嘅回憶：

•我仔出世嗰陣，我老公得萬幾蚊人工，之後我選擇自己湊，做FTM（Full time mother，全職媽媽）。兩年後生多個女，都係自己湊。佢哋冇讀N班，3歲開始讀學卷免費幼稚園，小學入讀地區一線津貼小學。到佢哋入咗小學，我就開始返part time（兼職），與此同時，老公人工一直有增長，期間我哋買咗私樓，小朋友讀書亦名列前茅，冇補習都考過級一。到小朋友高小，我哋就移民外國，而家兩夫婦搵返本行，生活輕鬆愉快！所以唔好因為錢，覺得俾唔到幸福小朋友。小朋友需要嘅係愛，只要一家人一齊進步，生活一定會愈來愈好！

•世上我諗只有香港咁嚴重咁叫人窮人唔好生仔。用幾多物質去衡量呢個家庭有幾快樂。當呢個家庭就算無乜物質，思維上對生活中嘅事，仍然會由心底表現得快樂時候。就有一堆人衝出嚟去話「你哋都唔夠快樂，咁樣生活叫快樂咩」 等等之類嘅說話。就好似睇到人哋快樂好睇唔順眼，係都要人地「比較」去想對方覺得自己不快樂。畸形社會。

•講真，小朋友將來係點都好講自己際遇同能力，開唔開心都係講同屋企人夾唔夾，好多有錢人生咗個小朋友，但無俾一個合適嘅童年生活佢地，個小朋友屋企食過世嘅錢都可以走去自殺，窮Ｘ生嘅小朋友亦唔一定將來無發展，將來都可以係個出色嘅人，有無小朋友係緣份，佢開唔開心，滿唔滿意你，都好睇佢用咩角度去睇嘅。

•恭喜恭喜！ 巴打終於升呢做爸爸啦！老實講月入2萬喺香港養BB都幾辛苦，但正如你所講，BB最緊要健康同埋父母嘅愛！我自己都係喺公屋長大，細個雖然冇乜錢，但係屋企人俾嘅愛真係冇得計！返學帶飯盒、著學校二手校服，而家諗返都係一段好溫馨嘅回憶！老豆老母咁辛苦養大我，所以做人都要努力啲，等佢哋安心！你個BB有你咁諗，已經好幸福！加油啊！做爸爸唔容易，但一定好值得！

•成日都話最緊要唔好心窮，努力啲改善生活就可以，小朋友開唔開心除咗因為經濟原因，最緊要其實係個家庭氣氛，爹哋媽咪關係好，每日都笑笑口迎接大家返屋企，小朋友一樣可以幸福。家庭氣氛唔好，俾你住到山頂，阿爸阿媽又掛住搵錢冇人理啲細路，一放咗學就對住姐姐（工人），小朋友都未必一定開心。

資料來源：smart_god_chan＠Threads

相關閱讀：22歲港女何文田買1千萬樓 隱形富二代「一原因」拒靠父蔭：「我仍要孭15年房貸！」↓↓↓↓

22歲的港女「盈盈」2023年仍讀大學四年級，但已在何文田買下一千萬元的單位，更在旺角開設一間4千呎的足浴店，單裝修便花了2百萬元，現已有盈利。

盈盈2023底11月被網紅訪問，這名商科大學生年紀小小，竟然已買樓開店，迅即成為網民矚目焦點↓↓↓↓