港女觀塘冰室食飯慘變受氣？斥收銀找錯錢兼態度惡劣 1句焫着事主：吞唔落呢啖氣
發佈時間：16:38 2025-07-30 HKT
本地餐飲業服務態度再引熱議，最近有港人在社交平台發文，指早前光顧觀塘一間冰室時，因結賬事宜與收銀員發生爭執，怒稱「香港發生咩事食個飯都比人屈？」事主指當時「埋單」總數為約$130，向收銀員付了$200，惟收銀員「竟然係找$2X蚊？，更一口咬定她只付$150，並稱有需要可以調閱閉路電視（CCTV）查證。經過一輪擾攘，事主最後竟被告知閉路電視「壞咗睇唔到」，在她連番追問之下，收銀員終承認有機會是「忙中有錯調轉左張單」，但態度仍然惡劣，更以1句惹怒事主，讓她直言：「吞唔落呢啖氣」，即看下文了解詳情。
港女觀塘冰室食飯變受氣？埋單付$200被指只俾$150
近日，有網民在Threads上以「香港發生咩事食個飯都比人屈？!」為題發文，稱在7月28日中午12點半到觀塘某冰室用餐，總共消費約$130元。由於餐廳只收現金，事主於是從錢包及利是封合共取出2張$100紙幣付款，「咁啱我銀包得$110，唔夠俾張單，咁我就由個銀包到拆個細利是封入面嗰$100嚟用，如是者我就將兩張100蚊去俾收銀。」
不過，當時收銀員並沒有立即找錢給事主，反而是先行處理下一位客人的款項，「正當我以為找錢俾我時，個收銀竟然找錢俾（$6X左右）下一個客人先，我成頭問號，而到我找錢時，竟然係找$2X蚊俾我？」事主當場指出正確找續金額應是約$60，惟2位收銀員堅稱只收到$150，「我哋兩個都見到你俾$150」，並稱可以調閱CCTV查證。
斥收銀員態度惡劣 1句焫著事主：吞唔落呢啖氣
但事件並沒有立即解決，由於收銀員稱「宜家忙，轉頭再睇」，加上事主也需要回去工作，因此她留下電話號碼方便店家回覆便離開餐廳。返回公司途中，事主覺得可能是在付款時「調轉咗張單嚟找錢」，因此還特意回餐廳提醒，但只獲店員回覆：「我唔知，等睇CCTV喇。」事主直言，「由收錢至找錢嗰個阿姐，兩個語氣態度都好差，覺得我呃佢地咁，而且仲要完全唔聽人講嘢，完全無意欲去搵返張單係咪出錯。」
直至下午2時，事主收到收銀員致電，對方重申「銀頭無錯，你係俾$150」，並稱CCTV需時檢查，但直到晚上7時餐廳仍無回音，事主只能親自返回餐廳追問，卻被餐廳經理告知閉路電視「壞咗睇唔到」，「我就話咁即係口同鼻拗，你講咩都得㗎啦。之前兩個收銀就實牙實齒話睇CCTV，要去到真係睇啦，就話壞咗睇唔到，究竟係真係壞咗啊？ 」有見事主怒火中燒，餐廳經理勉強提出賠償並向事主道歉，「雖然佢講緊唔好意思，但佢（經理）個面部表情話俾我聽佢係唔願意。」
其後，收銀員向事主找續$73，惟事主表示「我下午係坐42號枱，你比張4A枱嘅單比我有咩用？而且我張單係$13X，唔係$127」，而收銀員此時突稱有機會是「忙中有錯調轉咗張單嚟找」，又勉強說了一句「對唔住囉」。事主認為其態度敷衍，拒絕接受道歉並離開餐廳，「道歉得咁晦氣，可以唔洗同我道歉，而你嘅道歉我都唔接受。」
最後事主提醒，指下次再遇到類似金錢糾紛時，「解決唔到要即時報警，搵警察嚟即刻take record 」，又指雖然餐廳最終願意賠償$65，但她「真係吞唔落呢啖氣」，直言「食嗰20分鐘午飯，無啦啦受咁多氣，唔開心咗一日，仲要收到句『對唔住囉』嘅道歉。」
網民留言：下次再遇到即刻報警！
帖文引起網民熱議，有曾光顧過的網民直言該餐廳職員的服務態度向來不算好，「啲嘢係好食嘅，但因為只收現金同埋收銀個樣好似全世界欠佢錢咁，所以我已經好耐冇再去」、「11點食飯未到繁忙時間大把位就逼人搭枱，找錢嗰個又衰格」、「呢間野唔止收銀難頂，連啲樓面都一樣衰到一個點，所以而家都好少去食。」
也有不少網民提醒事主下次遇到類似事件時應如何處理，「有啲人真係搏你怕麻煩嘥時間……再遇到千祈唔好怕麻煩，傾唔到就報警。我唔貪人，都唔想蝕比人，仲要自己激氣。錢銀嘢，搵警察嚟做第三者睇實最穩陣」、「了解呢種情況餐廳同職員有可能違反嘅法律，同埋作為顧客你要保留咩證據」、「其實當時你應該報警！因為當下有壓力！雖然警察都唔會做到咩，但如果當時即時應該可以睇到CCTV！」
圖片及資料來源：Threads@inteeintea
文：Y
延伸閱讀：港女路德圍買豆腐花做1事被喝罵？斥店方態度差獲回覆「係咁差㗎喇」 街坊：點解你排呢間
