港女观塘冰室食饭惨变受气？斥收银找错钱兼态度恶劣 1句焫着事主：吞唔落呢啖气
发布时间：16:38 2025-07-30 HKT
本地餐饮业服务态度再引热议，最近有港人在社交平台发文，指早前光顾观塘一间冰室时，因结账事宜与收银员发生争执，怒称「香港发生咩事食个饭都比人屈？」事主指当时「埋单」总数为约$130，向收银员付了$200，惟收银员「竟然系找$2X蚊？，更一口咬定她只付$150，并称有需要可以调阅闭路电视（CCTV）查证。经过一轮扰攘，事主最后竟被告知闭路电视「坏咗睇唔到」，在她连番追问之下，收银员终承认有机会是「忙中有错调转左张单」，但态度仍然恶劣，更以1句惹怒事主，让她直言：「吞唔落呢啖气」，即看下文了解详情。
港女观塘冰室食饭变受气？埋单付$200被指只俾$150
近日，有网民在Threads上以「香港发生咩事食个饭都比人屈？!」为题发文，称在7月28日中午12点半到观塘某冰室用餐，总共消费约$130元。由于餐厅只收现金，事主于是从钱包及利是封合共取出2张$100纸币付款，「咁啱我银包得$110，唔够俾张单，咁我就由个银包到拆个细利是封入面𠮶$100嚟用，如是者我就将两张100蚊去俾收银。」
不过，当时收银员并没有立即找钱给事主，反而是先行处理下一位客人的款项，「正当我以为找钱俾我时，个收银竟然找钱俾（$6X左右）下一个客人先，我成头问号，而到我找钱时，竟然系找$2X蚊俾我？」事主当场指出正确找续金额应是约$60，惟2位收银员坚称只收到$150，「我哋两个都见到你俾$150」，并称可以调阅CCTV查证。
斥收银员态度恶劣 1句焫著事主：吞唔落呢啖气
但事件并没有立即解决，由于收银员称「宜家忙，转头再睇」，加上事主也需要回去工作，因此她留下电话号码方便店家回复便离开餐厅。返回公司途中，事主觉得可能是在付款时「调转咗张单嚟找钱」，因此还特意回餐厅提醒，但只获店员回复：「我唔知，等睇CCTV喇。」事主直言，「由收钱至找钱𠮶个阿姐，两个语气态度都好差，觉得我呃佢地咁，而且仲要完全唔听人讲嘢，完全无意欲去揾返张单系咪出错。」
直至下午2时，事主收到收银员致电，对方重申「银头无错，你系俾$150」，并称CCTV需时检查，但直到晚上7时餐厅仍无回音，事主只能亲自返回餐厅追问，却被餐厅经理告知闭路电视「坏咗睇唔到」，「我就话咁即系口同鼻拗，你讲咩都得㗎啦。之前两个收银就实牙实齿话睇CCTV，要去到真系睇啦，就话坏咗睇唔到，究竟系真系坏咗啊？ 」有见事主怒火中烧，餐厅经理勉强提出赔偿并向事主道歉，「虽然佢讲紧唔好意思，但佢（经理）个面部表情话俾我听佢系唔愿意。」
其后，收银员向事主找续$73，惟事主表示「我下午系坐42号枱，你比张4A枱嘅单比我有咩用？而且我张单系$13X，唔系$127」，而收银员此时突称有机会是「忙中有错调转咗张单嚟找」，又勉强说了一句「对唔住啰」。事主认为其态度敷衍，拒绝接受道歉并离开餐厅，「道歉得咁晦气，可以唔洗同我道歉，而你嘅道歉我都唔接受。」
最后事主提醒，指下次再遇到类似金钱纠纷时，「解决唔到要即时报警，揾警察嚟即刻take record 」，又指虽然餐厅最终愿意赔偿$65，但她「真系吞唔落呢啖气」，直言「食𠮶20分钟午饭，无啦啦受咁多气，唔开心咗一日，仲要收到句『对唔住啰』嘅道歉。」
网民留言：下次再遇到即刻报警！
帖文引起网民热议，有曾光顾过的网民直言该餐厅职员的服务态度向来不算好，「啲嘢系好食嘅，但因为只收现金同埋收银个样好似全世界欠佢钱咁，所以我已经好耐冇再去」、「11点食饭未到繁忙时间大把位就逼人搭枱，找钱𠮶个又衰格」、「呢间野唔止收银难顶，连啲楼面都一样衰到一个点，所以而家都好少去食。」
也有不少网民提醒事主下次遇到类似事件时应如何处理，「有啲人真系搏你怕麻烦嘥时间……再遇到千祈唔好怕麻烦，倾唔到就报警。我唔贪人，都唔想蚀比人，仲要自己激气。钱银嘢，揾警察嚟做第三者睇实最稳阵」、「了解呢种情况餐厅同职员有可能违反嘅法律，同埋作为顾客你要保留咩证据」、「其实当时你应该报警！因为当下有压力！虽然警察都唔会做到咩，但如果当时即时应该可以睇到CCTV！」
图片及资料来源：Threads@inteeintea
文：Y
延伸阅读：港女路德围买豆腐花做1事被喝骂？斥店方态度差获回复「系咁差㗎喇」 街坊：点解你排呢间
