殯葬禮儀師憶述「行家最驚」善終個案送別流產嬰兒嘆「父母喊唔出嘅悲痛會傳染」 1原因棺木底偷放牛奶餅

更新時間：17:35 2025-05-21 HKT
發佈時間：17:35 2025-05-21 HKT

殯葬禮儀師每日面對生死，為逝者送行。然而就算是「身經百戰」的禮儀師，也會遇到心悒的時刻。最近，一位從事殯葬行業十數年的禮儀師分享早前接手的一宗「行家最驚」個案，全因送別對象是一名流產嬰兒，他在社交平台憶述當時的情景，感嘆嬰兒父母雖然直至儀式結束始終未曾流淚，但他卻感悟到「父母喊唔出嘅悲痛會傳染」，又透露自己於棺木底偷放牛奶餅的原因。

殯葬禮儀師憶述「行家最驚」善終個案送別流產嬰兒嘆「父母喊唔出嘅悲痛會傳染」

禮儀師Alfred從事殯葬行業十數年，於社交平台開設「香港善終禮儀教室」專頁，分享禮儀師的工作經歷。最近，他發文分享一個深刻個案，形容該個案是「行家最驚」，全因送別對象為流產嬰兒，不少行家都會「耍手擰頭」拒接，直指「呢啲job邪到貼地」、「陰功到唔敢收利是。」

Alfred補充，行家們「唔敢賺呢啲錢」皆因「又做得唔好嘅話，個小朋友會跟住個人。曾經有行家做過俾小朋友『掹衫尾』。」儘管如此，Alfred認為：「但係無人接，呢個世界就當佢無存在過？」

在帖文中，Alfred指自己在處理個案時充滿複雜情緒：「做咗殯儀十幾年，第一次摸住棺木手震。」又憶述當時情景「消毒藥水味仲濃過香燭味，隔住口罩都聞到對眼刺刺地。」在這個環境下讓送別顯得格外沉重，最令他感到心悒的是「BB父母企喺走廊陰影位，由頭到尾無喊過一聲——喊唔出嘅悲痛，原來真係會傳染㗎。」完成儀式後，他感到「心口有舊石」，反問自己：「究竟我今日送緊一個BB，定係送緊人性嘅最後溫柔？」

禮儀師送別流產嬰兒 1原因棺木底偷放牛奶餅

Alfred於文尾談及，自己堅持在棺木底偷偷放牛奶餅。至於原因方面，他向《星島頭條》記者透露是出於自己的工作習慣：「始終小嬰兒都係鍾意依啲嘢，當氹吓小朋友。食吓嘢玩吓，唔好百厭周圍搞嘢。」除了牛奶餅，Alfred在處理相似個案時亦會放糖果、牛奶、肚臍餅、BB衫、毛公仔等。

網民：睇文字都覺得好心痛

Alfred的經歷觸動不少網民，留言指「睇文字都覺得好心痛」、「你是個好人，專業又用心，大功德」、「多謝你肯去接呢個job，令呢位BB可以安息，好人好報，一生平安」、「小朋友未有經歷過一啲美好嘅事就已經離開世界，實在係頗不幸。」、「Respect，以前做醫院個陣接到呢啲case都會好難過，特別要幫個bb抹乾淨，比返爸媽睇個陣，係好震撼，呢世都唔會忘記。」

有網民則反問：「如果個個都唔肯接呢啲case的話，個BB最後（會如何處理？）」Alfred則回覆：「夭折嘅醫院會當醫療用品處理。」

有類似遭遇的網民亦留言分享：「當年我仔早產過身，但因未夠24w（星期）唔會當人處理，會以流產胎處理，聯絡過好多石廠都唔肯做流產胎石碑，當時真係沮喪，最後經介紹搵到機構可以陪落葬仲介紹埋石廠做石碑，睇住自己個仔長埋泥土真係好傷感，但亦因為咁，我釋懷咗。」又讚揚Alfred：「多謝你肯接呢啲case，可以俾到個安心父母。」

圖片及資料來源：香港善終禮儀教室@Threads