李辰安 - 河水彎彎楊九斤｜辰來之筆
發佈時間：03:00 2022-08-30 HKT
我細細個睇麗的電視，最深印象係楊九斤呢個角色，大家記唔記得？就係嗰套《大地恩情》，真係好好睇，好睇到隔籬台嘅節目要腰斬。
大家又在中環小酒館黃昏酒聚，靚仔侍應碧咸仔行過話︰「你講河水彎又彎吖嘛，我老竇成日唱，卡拉OK招牌歌。」哥哥仔，世伯一家係關正傑歌迷？「係呀，佢話差啲去參加乜嘢十八區業餘歌唱大賽，心水歌曲就係《大地恩情》。」我心諗，世伯好可能同歌神張學友同台比賽，仲要撞歌，到時要擲銀仔，決定邊個揀歌先。
「安仔，之前學校無教中國歷史，我就推薦大家去翻睇《大地恩情》，因為呢套劇係好有心機拍，同時可以反映民初時代之中國國情。」大師兄，我好似搵唔到呢套劇之盒裝VCD或者DVD，不過，依家上內地網站有得睇。「安仔，幾時都有呢套劇DVD賣，你仲乜搵唔到？上網淘都有啦。」事實上，每所中小學都應該買一套，唔上中史都睇下呢啲咁有養分之電視劇，等大家知道中國鄉情，尤其是故事取材今日之大灣區。
張翁今日簡簡單單飲啤酒，佢問我︰「呢套劇分三大單元，其中有講北京故事，又有金山故事，當然，《家在珠江》最親切。」係啦，最記得係《金山夢》，劉志榮（圖左）飾演之楊九斤畀人賣去美國做果園工人。「賣豬仔，仲以為百幾年前之事，原來依家都一樣存在。」
銀行偉話︰「睇見啲新聞都驚，賣豬仔最多去美國，電騙就可能去到東南亞集中營，唉，時代係輪流轉。」係囉，咁啱《大地恩情》撞正《輪流轉》。「安仔，你記唔記得結果如何？」大家似乎坐咗多拉A夢嘅時光機返到上世紀八十年代，好多回憶返晒嚟。
碧咸仔走過嚟湊熱鬧，問下大家兩台大戰到底是否麗的勝出。「上網搵到資料話︰無綫決定腰斬《輪流傳》，派杜琪峯連夜趕拍《千王之王》收復失地，打敗《大地恩情》。」
我就好似唔多覺當年大台反敗為勝，事關你腰斬就當你輸唔晒，都係投降輸一半，《千王之王》係王晶起朵之作，與王天林拍擋創佳績，成為電視台佳話，至於杜琪峰乃王天林徒弟，亦乘勢而出，真係奇迹劇集，不過，一套還一套，大家幾十年來之集體記憶係《大地恩情》KO大台，你話《千王之王》改變戰果，我就唔多認同。
「安仔，讀書又唔見你咁認真，你不如去電台講故仔，好唔好？」大師兄，咁又唔係咁講，歷史就係歷史，大家要尊重。「兩位世侄，唔好掛住講，快啲飲多杯，今日都好翳焗。」講開又講，當年麗的無法憑一劇追回敗局，始終要屈居第二，好唔抵。
「有乜抵唔抵，你知一個趨勢形成了，就會順住行，順頭順路，個天都改變不了。」係，就好似百幾年前，中國幾努力、幾有決心都改變不了又窮又落後之環境，成日畀人蝦，中國人生活好艱難。「之不過，今時今日，個勢喺中國呢一面，其他大國列強想搞我哋亦無符，都係嗰句啦︰輪流轉。」
楊九斤去澳門畀人賣豬仔，原來當年係好平常之事，因為澳門出晒名做人口販賣生意，你行過路過，好易畀人賣豬仔。「今時今日，古老當時興，香港、台灣忽然有好多楊九斤故事，更加想唔到，呢一門生意又有如此多人中招，真係世界艱難。」不過，幾艱難都唔及民初時代，大家千祈咪誤信人言，更加不要有貪念。
「安仔，你都九唔搭八，騙徒手法層出不窮，防不勝防，我日日都收唔少垃圾信息，話有筍工介紹，上網更加有好多廣告如是說，當局同相關網站要睇實。」講開民國時代，除咗有人賣豬仔，亦有留學生剪辮投身革命，好似潘志文、劉松人飾演之角色就好正氣。依家有無人會做革命志士？「安仔，飲多杯啦，革命志士喺黃花崗，唔好講咁多，通關之後，同你上廣州旅行，去埋黃埔軍校開下眼界。」
通關？我都唔知幾時可以返大灣區，三年啦，就快三年零八個月，我都無乜寄望，總言之隨緣。「大家飲埋呢杯，準備去隔籬小廚食晚飯，今晚有八寶鴨，認真難得，我早兩日訂好咗，值得一試。」好，真係好，今日有食神，大家開開心心又一日，今晚無事做不如上網重溫三幾集《大地恩情》，幾歎世界呀！
