李辰安 - 大家都追《原振俠》｜辰來之筆
發佈時間：03:00 2022-07-26 HKT
晚黑瞓唔着，追睇《原振俠》，早兩日終於大結局了！回望當年香港電視劇最強勢之作，我覺得黎明好有代表性，四大美人、天后聚集一齊，你估咁簡單。
是日飲茶又係例牌四個好朋友，我話原振俠不比衛斯理失色，但係衛斯理Number one地位無可動搖。「安仔，你點解認為黎明好有代表性，我覺得原著之原振俠係腦科專家，應該唔係咁後生，所以我覺得電視之原振俠係年輕版。」張翁原來晚晚都有捧黎明場，佢話三十年前真係睇唔明，依家愈睇愈有趣。我心諗，張翁嗰陣邊坐得定喺屋企煲劇呢？火麒麟周身癮，睇《原振俠》，呢啲劇情真係好似外星人咁離奇，當然，我唔會講出口，只係應酬式回應︰「係啦，張翁你認為當年叫王靖雯之未來天后有無冠軍相。」
大家無理我，研究有乜好食，老闆話休魚期，無乜海鮮供應，不過有條杉斑，一於用「清缸價」酬賓。大師兄向張翁打個眼色，明晒。「老闆，今日不如整個菜遠牛肉炒米，加個冬瓜盅先。」嘩，呢條斤零之杉斑要成千銀，唔好啦，我不如過去隔籬食炸魚薯條好過。
講起王靖雯，大家都推舉佢係後現代天后，何解？佢唔係無厘頭，而係好前衞，前衞得過王家衛，大導演拍佢戲，幾乎駕馭不來，事關後來名叫王菲之天后，表情係無法複製，也幾乎難以用筆墨或言語形容，總之係好飄好逸，用句行貨少少之形容，王小姐就好似天外飛仙，睇着佢，你有即時唔知去咗邊個時空之感覺。
「安仔，你又係九唔搭八，王菲係被歌藝耽誤之電影巨星，你睇唔明佢嘅演技，說明你電影修養未能達標。」老闆又想過嚟Sell吓條魚，佢話要去到八月中先至有魚返，點解唔要食杉斑？我話︰「老闆，你有睇《原振俠》？」然後，我又同大師兄講，《原振俠》角色要成熟一啲先至有說服力。老闆答我︰「我睇衛斯理多啲，許冠傑做過電影版衛斯理，真係好好睇。」
好啦，大家想食山竹牛肉、雞絲粉卷，差唔多啦，開頭都掃咗一輪蝦餃、燒賣同粉果。銀行偉原來亦有睇《原振俠》，今日確係擁躉坐埋一枱，氣氛異常高漲。「我覺得搵音樂總監鋼鐵俠演原振俠會好啲。」我無意見，不過想加碟炸雲吞，好耐無食啦。張翁話︰「香港鋼鐵俠有才華又有型，電視台可以諗下為佢開套劇啦，嗱，世侄，你咁鍾意寫嘢，不如寫個同《原振俠》差唔多橋之科幻小說劇本啦。」
張翁話可以搵志偉傾下。「講笑啦，不過，我可以度個銅鐵俠角色出嚟，一樣可以講外星人同埋四大美人。」大師兄話︰「點解叫銅鐵俠？」因為鋼鐵俠個名有版權？「可以叫元宇宙俠，個名時款好多。」係噃，潮流興元宇宙，不如就改成「原宇俠」，好唔好？「好，你幾時開筆寫先至得，唔好等到下個休魚期到，你都無聲氣。」
其實，元宇宙係一個全新的平行時空，只不過你不是超出這個銀河系，而係最新數字打造之互聯網，已經擁有超時空的模擬空間。「長話短說，原宇俠可以穿梭去不同朝代，也可以去到未來，呢條橋唔使又要去搵火星人嚟地球，外星生物可以化成0與1之電波，從幾十億光年，瞬間傳送到網上，於是上演不同科幻情節。
「辰哥，不如玩電視台套劇條橋，忽然返到童年回憶，又忽然可以變成大個人，幾可愛呀。」我心諗，銀行偉你都九唔搭八，我依家賣科幻，唔係扮可愛，你真係九唔搭八。「偉哥，返老還童係另外一種橋段，不過，可以用元宇宙技術貫穿一個人之不同時期回憶與認知，就咁講會幾複雜，不過，有機會可以再探討，依家不如食米粉先啦。」
原宇俠，係存在於一個神秘元宇宙之內，佢可以由清朝打到太平天國，又可以由未來戰士返過嚟今日俄羅斯同烏克蘭戰場，總之乜都得，只有你想不到，沒有做不出之場景。「係嘞，大家有無更奇峰突出之睇法？」張翁補充︰「最緊要係小說中有足夠吸引之美少女角色，呢一個元素比科技更加重要。」我開始明白張翁點解晚晚睇三十年前之《原振俠》，因為劇中有四大美人，而四大美人難得再有如此整整齊齊出現。
食完米粉又飲完湯，好想再坐多陣，休息下先，下周再見。
