李辰安 - 大家都追《原振侠》｜辰来之笔
发布时间：03:00 2022-07-26 HKT
晚黑瞓唔着，追睇《原振侠》，早两日终于大结局了！回望当年香港电视剧最强势之作，我觉得黎明好有代表性，四大美人、天后聚集一齐，你估咁简单。
是日饮茶又系例牌四个好朋友，我话原振侠不比卫斯理失色，但系卫斯理Number one地位无可动摇。「安仔，你点解认为黎明好有代表性，我觉得原著之原振侠系脑科专家，应该唔系咁后生，所以我觉得电视之原振侠系年轻版。」张翁原来晚晚都有捧黎明场，佢话三十年前真系睇唔明，依家愈睇愈有趣。我心谂，张翁𠮶阵边坐得定喺屋企煲剧呢？火麒麟周身瘾，睇《原振侠》，呢啲剧情真系好似外星人咁离奇，当然，我唔会讲出口，只系应酬式回应︰「系啦，张翁你认为当年叫王靖雯之未来天后有无冠军相。」
大家无理我，研究有乜好食，老板话休鱼期，无乜海鲜供应，不过有条杉斑，一于用「清缸价」酬宾。大师兄向张翁打个眼色，明晒。「老板，今日不如整个菜远牛肉炒米，加个冬瓜盅先。」哗，呢条斤零之杉斑要成千银，唔好啦，我不如过去隔篱食炸鱼薯条好过。
讲起王靖雯，大家都推举佢系后现代天后，何解？佢唔系无厘头，而系好前衞，前衞得过王家卫，大导演拍佢戏，几乎驾驭不来，事关后来名叫王菲之天后，表情系无法复制，也几乎难以用笔墨或言语形容，总之系好飘好逸，用句行货少少之形容，王小姐就好似天外飞仙，睇着佢，你有即时唔知去咗边个时空之感觉。
「安仔，你又系九唔搭八，王菲系被歌艺耽误之电影巨星，你睇唔明佢嘅演技，说明你电影修养未能达标。」老板又想过嚟Sell吓条鱼，佢话要去到八月中先至有鱼返，点解唔要食杉斑？我话︰「老板，你有睇《原振侠》？」然后，我又同大师兄讲，《原振侠》角色要成熟一啲先至有说服力。老板答我︰「我睇卫斯理多啲，许冠杰做过电影版卫斯理，真系好好睇。」
好啦，大家想食山竹牛肉、鸡丝粉卷，差唔多啦，开头都扫咗一轮虾饺、烧卖同粉果。银行伟原来亦有睇《原振侠》，今日确系拥趸坐埋一枱，气氛异常高涨。「我觉得揾音乐总监钢铁侠演原振侠会好啲。」我无意见，不过想加碟炸云吞，好耐无食啦。张翁话︰「香港钢铁侠有才华又有型，电视台可以谂下为佢开套剧啦，嗱，世侄，你咁钟意写嘢，不如写个同《原振侠》差唔多桥之科幻小说剧本啦。」
张翁话可以揾志伟倾下。「讲笑啦，不过，我可以度个铜铁侠角色出嚟，一样可以讲外星人同埋四大美人。」大师兄话︰「点解叫铜铁侠？」因为钢铁侠个名有版权？「可以叫元宇宙侠，个名时款好多。」系噃，潮流兴元宇宙，不如就改成「原宇侠」，好唔好？「好，你几时开笔写先至得，唔好等到下个休鱼期到，你都无声气。」
其实，元宇宙系一个全新的平行时空，只不过你不是超出这个银河系，而系最新数字打造之互联网，已经拥有超时空的模拟空间。「长话短说，原宇侠可以穿梭去不同朝代，也可以去到未来，呢条桥唔使又要去揾火星人嚟地球，外星生物可以化成0与1之电波，从几十亿光年，瞬间传送到网上，于是上演不同科幻情节。
「辰哥，不如玩电视台套剧条桥，忽然返到童年回忆，又忽然可以变成大个人，几可爱呀。」我心谂，银行伟你都九唔搭八，我依家卖科幻，唔系扮可爱，你真系九唔搭八。「伟哥，返老还童系另外一种桥段，不过，可以用元宇宙技术贯穿一个人之不同时期回忆与认知，就咁讲会几复杂，不过，有机会可以再探讨，依家不如食米粉先啦。」
原宇侠，系存在于一个神秘元宇宙之内，佢可以由清朝打到太平天国，又可以由未来战士返过嚟今日俄罗斯同乌克兰战场，总之乜都得，只有你想不到，没有做不出之场景。「系嘞，大家有无更奇峰突出之睇法？」张翁补充︰「最紧要系小说中有足够吸引之美少女角色，呢一个元素比科技更加重要。」我开始明白张翁点解晚晚睇三十年前之《原振侠》，因为剧中有四大美人，而四大美人难得再有如此整整齐齐出现。
食完米粉又饮完汤，好想再坐多阵，休息下先，下周再见。
