李辰安 - 童年集體動漫回憶｜辰來之筆
發佈時間：03:00 2022-06-07 HKT
全城熱話原本係「天線得得B」，大家都小心行公司之餘，忽然又有更新話題，原來可以去日本旅行啦。
近日天氣幾奇怪，落完一陣大雨，又出大太陽，行行下街唔知點算好，於是好自然行入去商場，不過，之前有天線得得B事件陰影，咁就要好小心，唔好行差踏錯。「安仔，你唔好扮細個，你以為自己返老還童，見到得得B行埋去自拍呀？」是日在中環小酒館與老友相聚，覺得好有童年Feel，可能係暑假個天然鬧鐘依然在運作中。
「小朋友，你不如飲杯果汁汽水，唔好飲酒。」張翁，小朋友可以飲下威士忌加冰，事關近日有幾聲咳，一杯入喉可以解憂愁。「講開得得B，我覺得好奇怪，點解幾十年前班細路咁捧佢哋場，我就覺得呢個英國製造邊夠日本卡通動漫揮。」張翁，我想講個好消息畀大家知，日本將會對外開放旅遊大門，你可以去日本度假解鄉愁。「閘住，我鄉下喺大灣區，你唔好亂噏。」
大師兄話︰「安仔，你唔好九唔搭八啦，好唔好，依家唔好再講返鄉下，你估係你嗰班中環OL咩。」銀行偉出嚟大腳解圍︰「大家飲杯先，大啖大啖咁飲，消下暑氣。」其實，我都想去日本，因為我最鍾意係鹹蛋超人同高達。日本有一比一高達，嗱，咁高大，就算無欄無柵，你行埋去都唔會推得跌，你估我係哥斯拉？
鹹蛋超人真係我童年回憶，當年有個同學仔暑假舉家去日本旅行，買咗一個好型嘅鹹蛋超人肖像筆盒，嘩，全班同學小息時間圍住佢，好似開展覽會一樣。「幾十年前一家人去日本唔少嘢，你係咪講貴族學校？」偉哥，我唔識得答你呢個問題，之不過，同學仔有錢都好平常，我當時只係羨慕佢咁有品味同眼光，識得買個鹹蛋超人筆盒，連好怕醜嘅女同學都要八卦下，問你服未。
回憶香港掀起東瀛熱潮之時，我唔食魚蛋、唔飲汽水，死慳死抵都要買日本漫畫睇。
「世侄，你睇乜動漫？係咪啲心跳回憶有女生穿運動裝嗰款。」張翁，你都鬼馬，乜你係日本軟性漫畫迷，失覺，失覺。「我其實好鍾意Q太郎，呢個漫畫早過叮噹。」大師兄記得電視台有播過Q太郎，當時都係大學生，一樣追住嚟睇。
望下小酒館出邊，成個夏天景色已經充滿香江，想當年有暑假放，可以去露營，當然，諗都未諗過可以搭飛機去日本，坐車去郊外途中，手中一本日本漫畫解長途旅程之悶，如是者，我細細個就識得呢一刻就係幸福。「安仔，點解你講大學嗰陣，轉咗去睇《龍虎門》系列？」我其實想解釋好耐，當年係我隔籬房讀會計嗰個大頭仔期期買嚟追看，我都係貪得意順手攞嚟揭下啫。
「你又唔見我追嚟睇？」大師兄，你咁有文學修養，入圖書館日借夜借都係金庸武俠巨著，邊有時間睇香港漫畫。大家飲多兩杯威士忌加冰，愈講愈起勁，大家都想當年，不過，我最有興趣知道作為有錢仔之張翁，暑假有乜好做？平時又睇乜嘢消閒書籍。
「我細個係上世紀五十、六十年代之香港，周末、周日早場有華納公司卡通片睇，買一筒聰明豆朱古力入場，睇到拍手掌，有次一個唔覺意，成筒跌落地，唉，嗰次好論盡，畀屋企人鬧到七彩。」張翁，睇完戲出去再買一筒，無問題啫。「世侄，搞到成地聰明豆，失禮死人又無公德。」張翁屋企比較有美國文化，父輩都係留學美國，所以叔伯兄弟最鍾意買美國漫畫。「上世紀五十、六十年代時興之美國漫畫係警匪故事，好Man，亦好暴力，全部美國原裝入口，英文版，但都係美國俗話同俚語，我都唔係好明解，叔伯就睇得好入迷。」
原來幾十年前嘅有錢人睇漫畫都有型過人，我問有無睇Batman？「梗係有，仲有漫威英雄系列，好多好多，多到眼花繚亂。」張翁話，結果都係變咗老夫子迷，留學美國時要屋企定時寄過去解鄉愁。點解老夫子咁好睇？「因為好好笑，仲可以學四字成語。」講咗咁耐，似乎無人有興趣講下天線得得B，我又問點解？「安仔，你已經唔係細路仔，你唔會明得得B喺佢哋眼中有幾咁得意。」總之，你見到得得B最緊要唔好行咁近，OK，大家飲多杯，然後散水！
