李辰安 - 童年集体动漫回忆｜辰来之笔
发布时间：03:00 2022-06-07 HKT
全城热话原本系「天线得得B」，大家都小心行公司之余，忽然又有更新话题，原来可以去日本旅行啦。
近日天气几奇怪，落完一阵大雨，又出大太阳，行行下街唔知点算好，于是好自然行入去商场，不过，之前有天线得得B事件阴影，咁就要好小心，唔好行差踏错。「安仔，你唔好扮细个，你以为自己返老还童，见到得得B行埋去自拍呀？」是日在中环小酒馆与老友相聚，觉得好有童年Feel，可能系暑假个天然闹钟依然在运作中。
「小朋友，你不如饮杯果汁汽水，唔好饮酒。」张翁，小朋友可以饮下威士忌加冰，事关近日有几声咳，一杯入喉可以解忧愁。「讲开得得B，我觉得好奇怪，点解几十年前班细路咁捧佢哋场，我就觉得呢个英国制造边够日本卡通动漫挥。」张翁，我想讲个好消息畀大家知，日本将会对外开放旅游大门，你可以去日本度假解乡愁。「闸住，我乡下喺大湾区，你唔好乱噏。」
大师兄话︰「安仔，你唔好九唔搭八啦，好唔好，依家唔好再讲返乡下，你估系你𠮶班中环OL咩。」银行伟出嚟大脚解围︰「大家饮杯先，大啖大啖咁饮，消下暑气。」其实，我都想去日本，因为我最钟意系咸蛋超人同高达。日本有一比一高达，嗱，咁高大，就算无栏无栅，你行埋去都唔会推得跌，你估我系哥斯拉？
咸蛋超人真系我童年回忆，当年有个同学仔暑假举家去日本旅行，买咗一个好型嘅咸蛋超人肖像笔盒，哗，全班同学小息时间围住佢，好似开展览会一样。「几十年前一家人去日本唔少嘢，你系咪讲贵族学校？」伟哥，我唔识得答你呢个问题，之不过，同学仔有钱都好平常，我当时只系羡慕佢咁有品味同眼光，识得买个咸蛋超人笔盒，连好怕丑嘅女同学都要八卦下，问你服未。
回忆香港掀起东瀛热潮之时，我唔食鱼蛋、唔饮汽水，死悭死抵都要买日本漫画睇。
「世侄，你睇乜动漫？系咪啲心跳回忆有女生穿运动装𠮶款。」张翁，你都鬼马，乜你系日本软性漫画迷，失觉，失觉。「我其实好钟意Q太郎，呢个漫画早过叮当。」大师兄记得电视台有播过Q太郎，当时都系大学生，一样追住嚟睇。
望下小酒馆出边，成个夏天景色已经充满香江，想当年有暑假放，可以去露营，当然，谂都未谂过可以搭飞机去日本，坐车去郊外途中，手中一本日本漫画解长途旅程之闷，如是者，我细细个就识得呢一刻就系幸福。「安仔，点解你讲大学𠮶阵，转咗去睇《龙虎门》系列？」我其实想解释好耐，当年系我隔篱房读会计𠮶个大头仔期期买嚟追看，我都系贪得意顺手攞嚟揭下啫。
「你又唔见我追嚟睇？」大师兄，你咁有文学修养，入图书馆日借夜借都系金庸武侠巨著，边有时间睇香港漫画。大家饮多两杯威士忌加冰，愈讲愈起劲，大家都想当年，不过，我最有兴趣知道作为有钱仔之张翁，暑假有乜好做？平时又睇乜嘢消闲书籍。
「我细个系上世纪五十、六十年代之香港，周末、周日早场有华纳公司卡通片睇，买一筒聪明豆朱古力入场，睇到拍手掌，有次一个唔觉意，成筒跌落地，唉，𠮶次好论尽，畀屋企人闹到七彩。」张翁，睇完戏出去再买一筒，无问题啫。「世侄，搞到成地聪明豆，失礼死人又无公德。」张翁屋企比较有美国文化，父辈都系留学美国，所以叔伯兄弟最钟意买美国漫画。「上世纪五十、六十年代时兴之美国漫画系警匪故事，好Man，亦好暴力，全部美国原装入口，英文版，但都系美国俗话同俚语，我都唔系好明解，叔伯就睇得好入迷。」
原来几十年前嘅有钱人睇漫画都有型过人，我问有无睇Batman？「梗系有，仲有漫威英雄系列，好多好多，多到眼花缭乱。」张翁话，结果都系变咗老夫子迷，留学美国时要屋企定时寄过去解乡愁。点解老夫子咁好睇？「因为好好笑，仲可以学四字成语。」讲咗咁耐，似乎无人有兴趣讲下天线得得B，我又问点解？「安仔，你已经唔系细路仔，你唔会明得得B喺佢哋眼中有几咁得意。」总之，你见到得得B最紧要唔好行咁近，OK，大家饮多杯，然后散水！
